________________
[२२२]
पविसामि जलियजलणे, भक्खेमि तंदुले तुलामि वडं । तत्तं पिबामि कोसं, फालं जीहाए गेण्हामि' ॥ एत्थंतरंमि जंपइ, सिद्धत्थो नारओ य गयणत्थो । भारहजणो य सव्वो, रोलं सव्वं निवारेउं ॥ 'राहव ! सीया, एसा सई सई अह महासती सीया । मा एत्थ कुण वियप्पं, न पूयरा होंति दुद्धंमि' ॥ रामो वि भणइ लोयं, - 'मज्जाया नत्थि तुम्ह थोवा वि । अन्नह पूरओ जंपह, अण्णह पण भसह पट्टीए । जइ सीलवई सीया, ता किं तइया इमो जणो सव्वो । दोसगहणेक्कनिरओ, जाओ सीयाए निल्लज्जो ? ॥ ता तुम्ह जंपियमिमं, निम्मज्जायं न एत्थ कज्जमि । जाव न सुद्धी विहिया, ताव पमाणं करेमि'त्ति । इय भणमाणो रामो, आएसं देइ किंकरजणाणं । 'खड्डूं खणेह सिग्धं, चउरंसं मंचमज्झत्थं ॥ हत्थसयतिगपमाणं, खणिउं चाउद्दिसि पि पूरेह । कट्ठाण खायराणं, जालह तत्तो य सव्वत्थ' ॥ संपाडियं च सव्वं, तेहिं वि एत्थंतरंमि तत्थेव । हरिविक्कमो नरिंदो, उत्तरसेढीए वेयड्ढे । जयभूसणो कुमारो, सिरी' भज्जाए वरसुओ तस्स । सो परिणइ अट्ठसए, महिलाणं खेयरवरीणं ।। कइया वि अग्गमहिसी(सिं), पेच्छइ सो किरणमंडलं नाम । नियभाउगेण सद्धिं, हेमसिहेणं समासत्तं ॥ दट्ठण धाडिया सा, गेहाओ सो वि जायवेरग्गो । जयभूसणो कुमारो, पव्वइओ कुणइ तवचरणं ॥ मरिऊण सा वि जाया, विज्ज(ज्जु )मुही नाम रक्खसी घोरा । तो जयभूसणसाहुं, साएयबहिमि पडिमठियं ॥ नाऊणऽवि(व)हीए तया, बहुमुवसग्गेइ रयणिसमयंमि । जायं केवलनाणं, मुणिणो वि य रयणिविरमंमि ॥ हरिगवेसी( हरिणिगमेसी) देवो, तत्तो नाऊण दोन्नि कज्जाई । साहइ इंदस्स तओ, इंदो वि वियाणिउं सव्वं ॥ तं भणइ – 'वच्चसु तुमं, सण्णेझं कुणसु जणयतणयाए । अहयं साहुसयासे, केवलिमहिमाए वच्चामि' ॥ इय भणिऊणं सक्को, हरिणिगवे(मे)सिं सुरं सयासंमि । पट्ठविउं सीयाए, सयं गओ केवलिसयासे ।।
