________________
[२१४]
एवं कयंतवयणेण, भासियं राहवो सुणेऊणं । मुच्छावसो निवडिओ, धस त्ति धरणीयले सहसा ।। लक्खणपमुहेहिं तओ, सित्तो चंदणजलेण सिसिरेणं । लहिऊण चेयणं सो, अक्कंदेउं समाढत्तो । 'हा निग्घिणेण कह सा, सीया मे हारिया गुणनिहाणं । अलियपवाइयलोयस्स कारणे मूढचित्तेणं' । एवंविहं च दटुं, सोमित्ती राहवं भणइ एवं । 'धीरत्तणं पवज्जह, चइऊण सोयसंबंधं ।। रक्खिज्जतो वि जओ, जीवो इह धीरपुरिसवीरेहिं । पुव्वकयाण न चुक्कइ, मरणावइ-दुक्खनियराणं ॥ तह वि पुरिसेण नीई, पउंजियव्वा जओ उ नीईए । पावइ जं लहियव्वं, नीइबला एत्थ दुलहं पि ।। तम्हा कीरउ नीई-ए उज्जमो तंमि रण्णमझमि । गंतूण गवेसिज्जउ, सीया मा इह चिरावेह' ॥ इय भणिए ते सव्वे, खेयरवसहा राम-लच्छिहरा । घेत्तुं कयंतवयणं, उप्पइऊणं गया रण्णे ॥ सयलं पि तयं रण्णं, गवेसिऊणं अपत्तजणयसुया । 'सीहेण व वग्घेण व', भणंति – 'सा भक्खिया नूणं' ॥ एवं विमुक्कआसा, जणयसुयाएँ [करेंति मयकिच्चं] । [*] समागयाए, दुक्खसहेज्जाए सीयाए । दुक्खाण भाइणी सा, जाया जम्मं पि रण्णवासेणं । संपइ पुण परिचत्ता, रामेणं लद्धरज्जेणं ॥ न य गणियं वयणिज्जं, इत्थीवज्जा य भूणवज्जा य । न य गब्भस्स विवत्ती, न य दुक्खं रणजंतीए' ॥ इय एवमाइबहुयं, नायरियाओ उवालभंतीओ । रामं; रुवंति सीया-सील-गुणे वण्णमाणीओ ॥ एत्तो पुंडरियपुरे, सीया समयंमि पुत्तजुयलं तु । सुहतिहि-नक्खत्तंमी, सुहंसुहेणं पसूय त्ति ।। नाउं सीयपसूई, दोण्हं पुत्ताण वज्जजंघो सो । जम्मूसवं महंतं, परितुट्ठो तत्थ कारवइ ॥ तत्तो अणंगलवणो, बीओ मयणंकुस त्ति नामाइं । विहियाइं नरवरेणं, सीयातणयाण दोण्हं पि ॥
*अत्र पञ्चषाः पङ्क्तयस्त्रुटिता इति प्रतिभाति ।
