Page Text
________________
[२०५]
मुणिणा। भणिओ य - 'जइ पव्वज्जं लेसि ता मेल्लावेमि' । पडिवन्ने य तेण मोयाविऊण पव्वाविओ। कयतव-चरणो मरिऊण गओ सुरलोयं' ।
'पुणो चुओ महुरापुरीए चंदभद्दस्स राइणो कंचणपहाए देवीए अयलो नाम पुत्तो उववन्नो । सो य रण्णो चंदलेहाहिहाणाए बीयदेवीए सुएहिं जेट्ठभायरेहिं भाणुप्पहाईहिं 'पिउणो अइपिओ मा रज्जधरो होउ'त्ति संभावयंतेहिं वहिउमाढत्तो । ते य वियाणिऊण छिद्दगवेसिणा मंतिणा कहियसरूवो पणट्ठो अयलो । हिंडंतो य पुहइमंडलं एक्कंमि तिलयवणे विद्धो तिक्खकंटगेण । तेणं य वेयणत्तो परिसक्किउं पि असमत्थो दिट्ठो पंथसमीवट्ठिओ अंकनामेण सावत्थिपुरीनिवासिणा अविणयकारि त्ति संभाविऊण जणय-जणणिनिद्धाडिएण तं पएसंतरमागएणं अडवीए कट्ठहारं गहिऊण नियत्तेण । तओ मोत्तूण तं कट्ठहारं तं च अच्चंतपीडियं कंत्सं(दं?)तं सोऊण करुणाए अवणीओ तेण तस्स कंटगो । जाओ य सत्थो कुमारो तस्स अवणयणे । तओ भणिओ अयलेण कट्ठहारवाहगो अंको – 'भो ! जइ महुराहिवइं अयलं निसुणेज्ज कहमवि, ता तए तस्सयासमागंतव्वं' । तओ ‘एवं करिस्सामि'त्ति वोत्तुं गओ सावत्थीए अंको' ।
'अयलो वि कालंतरेण कोसंबीए पत्तो उज्जाणे । तत्थ य सीहोवज्झायसयासे धणुव्वेयमब्भस्समाणं पेच्छइ इंददत्तं नाम कोसंबीनरीसरं । तओ धणुद्धरत्तं दंसिउं समाढत्तो । तोसिया य ते उवज्झाय-नरवई धणुद्धरत्तेण । तओ इंददत्तेण परितुद्रुण दिण्णा अचलस्स मित्तदत्ता नाम निययदुहिया सह देसेण । जाओ य महाराया । साहिया य अंगाईया बहवे देसा । अण्णया य समागओ महुराभिमुहो पिउणो उवरि । जायं च आओहणं । गहिया य चंदलेहाए सुया चंदभद्दस्स पुत्ता सह सामंतेहिं जुज्झमाणा भाणुप्पहाईया अयलेण रणमहे । आयण्णो य चंदभद्दो तेहिं । तओ संधिसेवानिमित्तं पेसिया अयलसयासे महंतगा । तओ अयलेण ते वियाणिऊण साहिओ य निययवुत्तंतो । तेहिं वि परिणाओ जहा - एस सो अयलो चंदभद्दनरवइसुओ। साहियं च तेहिं चंदभद्दस्स इमं सव्वं । परितुद्वेण य समाइच्छिओ अयलो परमतोसेण । पवेसिओ महुरापुरीए गरुयविच्छड्डेणं । तओ वच्चंते काले निवेसिओ निययरज्जंमि । इयरे वि ते चंदलेहासुया भाणुप्पहाईया धाडिज्जंता रज्जाओ धरिया अयलेणं विण्णविऊण महारा[यं] । तहा वि आणत्ता अदिट्ठसेवाए नरवइणा' ।
'अण्णया य दिट्ठो अयलनरवइणा नडरंगत्थेण अंको हम्ममाणो पडिहारेहिं । ते य हणमाणे निवारिऊण कयसम्माणस्स दिण्णा सा तस्स सावत्थीजम्मभूमी भुत्तीए । कुणंति य दो जणा ते रज्जं । अण्णया उज्जाणगएहि दिट्ठो समुद्दायरिओ नाम आयरिओ । तस्स समीवे धम्मं सोउं निक्खंतो कालं काऊण बंभलोए देवो जाओ । तओ चुओ अयलदेवो जाओ दसरह-केगईणेसो भरहभाया सत्तुघणो नाम पुत्तो । तेणिमस्स महुरानयरीए उवरि गुरुपडिबंधो । अंकदेवो वि तओ चुओ रामस्सेसो कयंतवयणो नाम सेणाहिवई जाओ'त्ति ।
___ इओ य पहापुरे सिरिनंद[ण]स्स रण्णो धारिणीभज्जाए सुरनंद-सिर(रि )नंद-सिरितिलय:सुंदर -जयंत-चमर-जयमित्त नामगा सत्त पुत्ता । अण्णया य सिरिनंदणो मासजायं पुत्तमभिसिंचिऊण रज्जे, सुरनंदाईहिं सत्तहिं वि पुत्तेहिं समं पीई(इ)करस्स सूरिणो समीवे पव्वइत्ता सिद्धो । सुरनंदाइया वि विहरमाणा संपत्ता महुराउरीए । जाओ य वरिसाकालो । तत्थेव ठिया सेलगुहाए । ते य भगवंतो जंघाचारण[ल]द्धीया छट्ठ-ऽट्ठमाइतवं काऊण महुराउरीपासट्ठियट्ठाणेसु नहगमणेण गंतुं पारित्ता य पुणो वि सेलगुहागया तवं कुणंति । समवसंता[ण] य महुरापुरीए तेसिं तवपहावओ सा चमरविउव्विया जणमारी
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |