Page Text
________________
[१९४] पविट्ठा मंतहरे । तओ भणियं जंबवंतेणं – 'न एस दीहसुत्तमंतणयकालो । पेसिज्जंतु तत्थ हणुय-भामंडलअंगयकुमारा' । तओ ते पवणंजय-जल(ण)य-सुग्गीवतणया भणिया रामदेवेण सायरं, जहा – 'वच्छा ! तुब्भेहिं गंतव्वं साएयपुरीए भरहराइणो सगासे विसल्लाण्हाणोदगाणयणत्थं, लक्खण-सत्तिनिक्खमणकएणं'। ते वि भणिऊण – 'जं देवो आणवेइ'त्ति पइट्ठा तुरियतुरियगइगमणा। पत्ता य साएयपुरीए भरहसयासे । साहियं च तेहिं तस्स सव्वं संखेवेणं सीयाअवहरणाइयं लक्खणसत्तिपहारपज्जतं ।
तं च निसामिऊण भरहो अच्चंतभिउडिभासुरो जाओ रणे पडिहत्थुच्छाहो । भणियं च णेण – 'रे रे पडिहार ! दवावेह सिग्धं रक्खसवइरामणस्सुवरि संगामपयाणगभेरि' । तेहिं भणियं - 'न एत्थ संगामभेरीए किं पि पयोयणं, जओ अत्थाहमहासमुद्दअंतरिया लंकापुरी । एगमणेण जयत्थं अम्हे समागया तं निसामेह' । भरहेण भणियं – 'किं तयं?' तेहिं भणियं – 'विसल्लकण्णगाण्हाणोदगेण अहिसित्तलक्खणस्स जइ सा सत्ती निष्फिडइ तो जीवइ कुमारो रयणिमज्झे । अणहिसित्तो य मरइ अवस्सं सूरुग्गमे । ता लहुं तं संपाडावेह' ।
इमंमि भणिए सयमेव सह केगई[ए] भरहो तेहिं समण्णिओ गओ दोणमेहस्स नियमामगस्स गेहे। सिटुं तस्स सव्वं केगईए । भणिओ य जहा सव्वभूयसरणेण मुणिणा एसा विसल्ला पढमकल्लाणी महिलारयणं समाइ8 लक्खणस्स । ता एत्थ वियप्पो न कायव्वो' । तेण भणियं – 'जइ एवं ता किं ण्हाणोदगेण ? गच्छउ सयमेव विसल्ला कुमारलक्खणसमीवे' । तेहिं भणियं - ‘एवं होउ' । तओ रायकण्णासहस्सेण समं पयट्टा विसल्ला । आरूढाओ य सव्वाओ भामंडलविमाणे । समुप्पइऊण झड त्ति सव्वेवि पत्ता खंधारसन्निवेसं समुत्थ(त्थु)गस्स गाढं रामदेवस्स तेसिं समागमणे ।
अवयरिया य कयग्घा विसल्ला विमाणाओ । समागया लच्छीहरसयासे । उवविसिऊण य फरिसिओ दोहिं वि करेहिं लक्खणकुमारो । विणिग्गया य झड त्ति लक्खणहिययाओ सा विजयसत्ती । पयट्टा य सा नहयले गंतुं, समुप्पइऊण य गहिया हणुएण । तओ जाया देवयासरूवा । भणिओ य तीए हणुयंतो - 'मुंच मि(म)मं । नत्थि ममेत्थ को वि दोसो । जओऽहं रामणस्स अट्ठावयनगे धरणिंदेण पुव्वि दिण्णा आसि अमोहविजया-देवयारूवा सत्ती । न य केणाऽवि तिहुयणे एत्तियं कालं जित्ता । संपयं पुण इमीए विसल्लाए पुव्वभवोवज्जियमहातवाए तेयमसहमाणा वच्चामि निययं ठाणं ति खमेह मम सव्वं पि जं विणासियं' । एव्वं(व) च सव्वेसि पि चोज्जियाणं मुक्का सा हणुयंतेण गया नियठाणं ति ।
विसल्ला वि कयपणामा रामदेवस्स उवविठ्ठा पुणरवि लक्खणसमीवं । तओ हत्थफरिसं काऊण समालित्तो गोसीसचंदणेणं । तओ तक्खणमेव रूढवणो मोडिऊणंगाई समुट्ठिओ लक्खणकुमारो । तओ हरिसवसफुल्ललोयणेण रामदेवेण गाढमालिंगिऊण कहिया सव्वा वि तस्स वत्ता । तओ रामवयणेणं अण्णेसि पि निएल्लयाणं तहा कुंभयन्न-इंदइपमुहाणं सबलवाहणाणं कयं विसल्लाए नियण्हाणोदगे ज्झोक्खणं । तओ सव्वे वि जाया पुणण्णवसरीर त्ति । कयं महाविछड्डेण विज्जाहरेहिं वद्धावणयं । परिणीया य महाविभू[ई]ए लक्खणकुमारेण सा विसल्लत्ति ॥
तओ हेरियपुरिसेहितो नाऊण लक्खणकुमारं पच्चुज्जीवियं रामणो मंतिहरं पविट्ठो मंतिणो भणइ - 'कहेह, कहं कुंभयण्ण-इंदइपमुहाणं रामदेवसयासाओ मोक्खो भविस्सइ ?' मंतीहिं भणियं - 'देव ! पुण्णाहिओ रामदेवो पयंडसासणो बहुपरिवारो य । तुम्हे उण पुण्णाहिया वि पयंडसासणा वि बहुपरिवारा
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |