________________
[१९० ]
इय भणिओ सो कुद्धो, मेल्लइ सूलं सहोयरस्सुवरिं । तं सरवरेहिं वारइ, विहीसणो पहणिउं एंतं ॥
तं निरुद्धं, दसाणणो परमकोवमावण्णो । गेहइ अमोहविजयं, सत्तिं उक्कं व जलमाणं ॥ तं दट्टं करगहियं, ‘मारइ एसो विहीसणमवस्सं' । नाऊण ठाइ पुरओ, लच्छिहरो रक्खसवइस्स ॥ तो पभणइ वियसंतो, दसाणणो 'तुज्झ अहमहयधट्ठ ! ।' को अहिगारो अयणुय !, तावस ! मम ठाउं पुरओ ? | अहवा फिट्टउ वाही, वेज्जेण विणा वि मम सयासाओ । जइ इच्छसि मरिऊणं, ता चिट्ठसु थोवमिह वेलं ॥ तो लक्खणेण भणिओ, 'न होसि एवंविहाई जंपतो' । भंजिज्जइ तस्स रहो, खित्तेहिं पवरबाणेहिं ॥ जं जं आरुहइ रहं, तं तं लच्छीहरो सरवरेहिं ।
-
भंजइ; तओ गइंदं, आरूढो मुयइ तं सत्तिं ॥ विज्जु व्व पज्जा (ज्ज) लंती, जालामालाउला फुलिंगड्ढा । उयरइ सा वि सिग्घं, उज्जोयंती नहमसेसं ॥ तं हणइ सरवरेहिं, लच्छिहरो; राहवो वि बाणेहिं । हणुओ विमोग्गरेणं, सूलेण विहीसणो राया ॥ परिघेण य सुग्गीवो, पहणइ भामंडलो वि कुंतेणं । अन्ने वि वानरवरा, खिवंति निययाई सत्थाहिं ( इं ) ॥ सा वि अमोहा तेसिं, सव्वेसि पि य निवारमाणाणं । आगंतूणं विंधइ, लक्खणवच्छत्थलं पवरं ॥
सो तीए पहारेणं, अइदारुणवेयणाएँ घुम्मेउं । निवडइ धराए सहसा, निद्दाए मत्तहत्थि व्व ॥ तं पेच्छिऊण रामो, गयजीवं पिव महीयले पडियं । कुद्धो रावणसमुहं उद्धावइ रहवरारूढो ||
मुंचंतो सरनियरं, निसियरनिवहं रणे पणासेंतो । मारेंतो सयलबलं, संपत्तो रावणं तुरियं ॥
तं भणइ रामएवो, 'रामण ! लच्छीहरस्स मग्गेणं । वच्चसि अज्जाऽवस्सं, मया हओ अंतगगिहंमि ॥ इय भणिउं बाणेहिं निरंतरं पहरिउं समाढत्तो । छिंदइ छत्तं चावं, धय - कवयं भंजइ रहं च ॥ जं जं रहं विलग्गड़, जं जं गेण्हइ सरासणं तुरिडं । तं तं च रामदेवो, सहसा सयसिक्करं कुणइ ॥
-
