Page Text
________________
[१६६]
अण्णया पियंवओ दिण्णरयणरहरज्जो इयरेसिं च दिण्णजयरज्जे(ज्जो) छद्दिणाणि कयाणसणो मरिउं जाओ देवो । रयणरहो(हा)इया वि नियरज्जं पालिंति त्ति । अण्णया य सिरिप्पभा नाम अण्णराइणो धूया । तं च अणुद्धरो मग्गइ । पिउणा य रयणरहस्स दिण्णा । तं च परिणीयं रयणरहेण नाऊण रुट्ठो अणुद्धरो रयणरहस्स, चू(लू) डेइ तस्स देसं । एवं च देसं विणासमाणो गहिओ रयणरह-चित्तरहेहिं । विमाणिऊण य बहुप्पगारं मुक्को । तओ सो ताण बाधमाणाण धरियगरुयपरोसो जाओ अणुद्धरो नाम तावसो । तओ कह वि इत्थीसंबंधेण विहलीकयतवविहाणो संसारमणुहिंडित्ता मणुस्सो जाओ । तत्थ वि तावसो होऊण अण्णाणकटुं काऊण अनलप्पभो जोइसियसुरो जाओ । रयणरह-चित्तरहा वि रज्जमणुपालित्ता पव्वइऊणऽच्चुए देवलोए अइबल-महाबला नाम देवा जाया ।
तओ चुया सिद्धत्थपुरे खेमंकरस्स रण्णो विमलाए देवीए कुलभूसण-देसभूसणा नाम पुत्ता जाया। ते य अम्हे । तओ समयंमि रण्णा पढणत्थं समप्पिया घोसोवज्झायस्स । तेण वि सिक्खविया
व कलावित्थरं । तओ तेरि(र)समवरिसे घोसेण सह पिउसगासमागच्छंतेहिं रायभवणंमि वयंसियाहिं सह कीलमाणी दिट्ठा एगा पवररूवा कण्णगा । तं च संजायाणुरागा सविगारदिट्ठीहिं पलोयमाणा गया जणयसयासे । पणमिओ जणगो । रन्ना वि निवेइए अम्ह कलागहणे पूइओ [उ]वज्झाओ । तओ भणिया - 'वच्चह नियजणणि-भगिणीणं सगासे' । गयाण दट्ठण य जणणि सह तीए पुव्वदिट्ठकण्णगाए पडिया जणणिचलणेसु । तओ दाऊणाऽऽसीसं भणिया जणणीए – 'पुत्तगा ! एसा तुम्ह कणिट्ठिगा भगिणी कणयप्पहा नाम । जया य तुम्हे पविट्ठा लेहसालाए तया एसा बाला आसि' । तओ सोउमेवमम्हे लज्जिया गुरुवेरग्गमागया सव्वं चइऊण पव्वइया गुरुसगासे । जाव तवं कुणमाणा इह काउस्सग्गेणं ठिया । खेमंकरो वि तया अम्हं विओए काउमणसणं गरुडाहिवो महालोयणो नाम देवो जाओ । सो य जायासणकंपो ओहिणा नाऊण अम्हमुवसग्गं संपयमेवेसो समागओ चिट्ठइ त्ति ।
इओ य सो अनलप्पहो जोइसियसुरो महामिच्छदि(दि)ट्ठी अणंतवीरियस्स साहुस्सुप्पण्णे केवलनाणे सममण्णदेवेहिं गओ केवलिमहिमाकोउगदंसणत्थं । केवलिणा वि साहिओ तेसिं धम्मो । तओ पुच्छिओ धम्मकहावसाणे केवली(लि)सीसेणं – 'भयवं ! इमंमि भरहखेत्ते मुणिसुव्वयतित्थे वह(ट्ट)माणे तुम्हाणंतरं को केवली भविस्सइ ?' केवलिणा भणियं - 'मम निव्वाणगयस्स कुलभूसण-देसभूसणा जुगवं दो वि भायरो केवलिणो भविस्संति' । इमं च सोउमनलप्पभो सो सुरो पओसमावण्णो गओ निययावासं । अण्णया य विभंगेणं दट्ठणऽम्हे एत्थ काउस्सग्गट्ठिए 'करेमि संपयमणंतवीरियवयणं झुट्ठति चिंतमाणो समागंतुमुवसग्गिउमारद्धो । अवि य -
पुव्वभववेरसंदूमिएण दढजायगरुयरोसेणं । विविहमुवसग्गकरणं, पारद्धं तेण अइघोरं ॥ चत्तारि इह दिणाई, तेण कुणंतेण अम्हमुवसग्गं ।
जणिओ जणसंतावो, भइ[र]वसई जणंतेणं ।। संपयं पुण राम ! लक्खण ! तुम्ह तेयमसहमाणो गओ अनलप्पहो सट्ठाणं । अम्हं च कम्मक्ख[य]ओ समुप्पण्णं केवलनाणं' ।
तओ सोउमेवं केवलिभणियं गरुडाहिवेणं महालोयणेणं भणिओ रामदेवो - 'साह तुम्हेहिं कयमम्ह
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |