Page Text
________________
[१६४]
विसकण्णगा' । लक्खणो भणइ - 'कहेहि ताव केरिसी भण्णइ विसकण्णगा?' तेण भणियं निसुण - 'जीए सामण्णपुरिसो फरिसं पि सहिउं न समत्थो सा विसकण्णग त्ति । तओ रन्ना महाबलपरिक्खणत्थं घोसावियमिमं - "जो रायविमुक्कं सत्तिपहारं विसहइ तस्स दिज्जइ जियपउमा" । न य को वि तारिसो अत्थि एत्थ महीवीढे [जो] रायसत्ति(त्ती)ए पहारं सोढुं जियपउमं परिणेइ' ।
तओ सोउमिमं लक्खणो गओ रायसभं । दिवो य सत्तुदमणेण । तओ पवरागिइत्ति ठवावियं गरुयमासणं । उवविट्ठो लक्खणो । पुच्छिओ य तेण - 'कुओ तुब्भे ?' लक्खणो भणइ – 'भरहदूओऽहं एत्थ समागओ' पओयणवसेणं' । रन्ना भणियं - 'कह, किं पओयणं ?' लक्खणो भणइ - 'तुह विसकण्णापरिण[य]णं' । राया भणइ – 'जो मम सत्तिपहारं सहइ तस्सेवेसा दायव्वा' । लक्खणो भणइ - 'किमेक्केण? पंचसत्ति(त्तीहिं) पहरेसु' ।
एयंमि अंतरंमी, समागया तत्थ सा वि विसकन्ना ।
दट्टण लच्छिनिलयं, जाया मयणाउरसरीरा ॥ तओ रण्णा जायाणुरागाए जियपउमाए निवारिज्जमाणेणाऽवि घल्लियाओ लक्खणसम्मुहं पंच सत्तीओ। ताओ य -
वामेण दाहिणेण य, करहिं कक्खाहिं तह मुहेणेक्का ।
गहियाओ लक्खणेण, पंच वि दक्खेण सत्तीओ ॥ तओ सहरिसं जियपउमाए सयललोयपच्चक्खं सहत्थगुत्था(त्थो)ल्लंबिया लक्खणस्स गलए वरमाला । सत्तुदमणो वि खामिऊण लक्खणं भणइ - 'अज्जउत्त ! पडिच्छसु जियपउममिमं' । लक्खणो भणइ - 'नाऽहं सच्छंदो । किंतु मम जेट्ठो भाया बाहिरुज्जाणे चिट्ठइ, सो जाणइ' । तओ राया सपरियणो गओ रामसमीवं । पणमिऊण य सबहुमाणं पवेसिउं ससीओ रामो नयरे कयमुचियकरणिज्जं । तओ तत्थट्ठिएण केत्तियं पि कालं गंतुकामेण भणिओ सत्तुदमणो रामेण जहा – 'लक्खणो नियत्तंतो जियपउमं परिणिस्सइ । न वियप्पो कायव्वो । संपयं पुणऽम्हे सपओयणा अण्णत्थ वच्चिस्सामो' ।
तओ रयणीए सुत्तमि जणे निग्गया राम-लक्खणा । लंघित्ता य महाडविं पच्छिमदिवसे पच्छा(त्ता) वंससेलगिरिनियंबसंठियं वंसत्थलं नाम नयरं । दिट्ठो य तत्थ सव्वो वि तेहिं लोओ भयाउलो पलायमाणो सह नरवइणा । पुच्छिओ य तेस(सि)मेक्को पुरिसो रामदेवेण – “किमेस लोओ पलाअइ ?' तेण भणियं - 'अज्ज तइओ वह(ट्ट)इ दिणो इमंमि गिरिसिहरे सयलं पि रयणि समुच्छलइ कुओ वि भीमो महारवो । अओ तस्स भएण सव्वो वि लोओ दूरं गंतूण रयणि गमित्ता पहायसमए पुणरवि नयरमागच्छइ' । तओ सोउमिमं रामेण भणियो(ओ) लक्खणो – 'अहो चोज्जमेयं । ता तत्थेव वच्चामो'। लक्खणेण भणियं - ‘एवं होउ' । तओ समारूढा तं अइविसमं गुरुकिलेसेण गिरिवरं । दिट्ठा य तस्सत्थ(तत्थ) सिहरारूढेहिं काउस्सग्गत्था दो मुणिणो । वंदिऊण य परमभत्तीए रामो तं गोकण्णजक्खदिण्णं जहिच्छियं नाम वीणं तेसिं पुरओ भत्तीए वाइउमारद्धो । तओ लक्खणेणाऽऽरद्धं किंनरसरेण कागलीगीयं। सीया वि सहरिसं बहुभंगेहिं नच्चिउं प[व]त्ता ।।
एत्थंतरंमि य अत्थमिओ दिणयरो, जाओ संझासमओ । अंधारियाणि दिसामुहाणि । तओ सहस
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |