Page Text
________________
[१६३]
NNNNNNNNNNNNNNNNNNNNNNNNNNNNNNNNNNNNNNNN
न केवलं सो न समागओ, इत्थीवग्गो वि सव्वो वि संपेसिओ अणायरेण तुम्ह सहायत्थे' । तओ सोउमिमं गाढयरं सो रुट्टो ।
एत्थंतरंमि य समागया सव्वे वि इत्थीरूवधारिणो रामदेवाईया महाजोहा । तेण भणियं - 'निक्कालेह सव्वाओ इमाओ गहिऊण सिरोहराए मम पूरओ' । इमंमि भणिए समट्रिया सव्वे वि समच्छरा तस्स सामंता विद्दविउं समाढत्ता तं इत्थियावग्गं । तओ गहिउं रामदेवेण गयवरथंभं सव्वे वि पिट्टिउं समाढत्ता । तओ ते पलायमाणे दटुं समुट्ठिओ गहियखग्गरयणो अइवीरिओ । समुटुंतो य गहिओ अवहरिऊण खग्गं लक्खणेण केसेसु । बंधिऊण य तस्सेव वत्थेण विलग्गो तं गहिउं करणपओगेण समासण्णववत्थिए करिवरंमि । तओ गओ नंदावत्तपुरं । दट्ठण य मेल्लाविओ सीयाए । लक्खणेण वि 'भरहस्स तुमं सेवगो'त्ति वोत्तुं मुक्को अइवीरिओ । तओ अवणीओ देवयाए तेसिमित्थीवेसो । नाया य ते राम-लक्खणा ससीया । कयं च सव्वं पि तेसिमुचियकरणिज्जं ।
तओ गरुयसंवेगमावण्णो अइवीरिओ धरिज्जमाणो वि रामेण, 'तुमं मम ठाणे भरहस्स [सेवगो] होज्जास'त्ति भणिऊण दिण्णविजयरहपुत्तरज्जो निक्खंतो । वि(दि)ण्णा य रइमाला नाम नियभगिणी लक्खणस्स। इ(पडि)च्छिऊण य तं कण्णगं ते ससेन्ना विजयपुरे गय त्ति । इओ य सोउमइवीरियं नारीयणवेरग्गेण निक्खंतं हसंतो सत्तुहणो निवारिओ भरहेण पढिऊणेवं -
जं वा तं वा हेडं, चरिऊण मणे नरेण बुद्धिमया ।
संसारभीरुएणं, पव्वइयव्वं धुवं होइ ॥ एत्थंतरंमि य भरहाणाकरणत्थं समागओ विजयरहो । सम्माणिओ भरहेणं । तओ भरहस्स तेण दिण्णा रइमालालहुभगिणी विजयसुंदरी नाम कण्णगा । परिणीया य सा भरहेणं । भवियव्वयानिओगेण य विहरमाणो तत्थेवाऽऽगओ अइवीरियसाहू । नाऊण य भरहेण गंतुं वंदित्ता परमविणएणं खामिओ । विजयरहो वि भरहविसज्जिओ गओ नंदावत्तपुरं ति ।
तओ राम-लक्खणेहिं गंतुकामेहिं भणिओ महीहरराया – 'अज्ज वि हियइच्छियपएसमम्हेहिं गंतव्वं । ता न एत्थ तए अधिई कायव्वा' । तेण भणियं - 'देवो पमाणं, न किं पि अम्हे जाणामो' । तओ वणमाला सोउं तेसिं गमणं भणइ लक्खणं – 'न तए मम हत्थो वि गहिओ । किं पुण अण्णं भणामि ?' लक्खणेणाऽवि – 'भद्दे ! चिट्ठसु सुहेणं । सव्वं ते समए समीहियं करिस्सामि'त्ति वोत्तुं संठविया वणमाला।
तओ रयणीए सुत्ते जणे उट्ठिऊण ससीया गया राम-लक्खणा । पत्ता रन्नपएसं । तं पि लंघिऊण पविट्ठा वसिमं । कमेण य पत्ता खेमंजलिं नाम पुरं । ठिया य तत्थुज्जाणे । भुत्ता य लक्खणेणाऽऽणीयमाहारं । भुत्तुत्तरे य लक्खणो पुरीनिरिक्खणत्थं रामाएसं मग्गिऊण पविट्ठो खेमंजलिपुरिं । तीए नयरीए पइदिणं वि(दि)ज्जइ पडीगो(पडहो), घोसिज्जइ य - 'जो रायपहारं विसहइ तस्स राया देज्ज नियधूयं' । इमं च सोउं पुच्छिओ लक्खणेणेक्को पुरिसो – 'किमत्थमेरिसो पडहओ वाइज्जइ ?' तेण भणियं - 'किं तुमं अउव्वो जेण न जाणसि इमं वइयरं ?' लक्खणो भणइ - ‘एवं' । तेण भणियं सुण' -
'एत्थ नयरे सत्तुदमणो नाम राया । तस्स कणयाभाए देवीए जियपउमा नाम धूया । सा य
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |