Page Text
________________
[१५६]
vNNNNNNNNNNNNN
चंदप्पहसामिपडिमं नमंसिऊणोवविट्ठा एगदेसे । तओ रामवयणेणं दसउरमज्झे पविट्ठो लक्खणकुमारो । गओ वज्जयण्णसगासं । संभासिओ य तेण सायरं दिण्णासणो य उवविठ्ठो । भणिओ य तेण सूवयारो – 'लहु इमं महाणुभावं भुंजावेह' । लक्खणेण भणियं - 'अम्ह सामी सह कलत्तेण जिणहरे चिट्ठइ । न तेण भुक्खिएण अहं भुंजामि' ।
तओ राइणा भणियं – 'पयच्छह लड्डग्ग(ग)-मंडगाईयं इच्छाए इमस्स पवरमाहारं' । दिन्नो य तेण । तओ तं घेत्तुं गओ लक्खणो । भुत्ता य जहिच्छाए तं पवरमाहारं सव्वरसपुण(गुण)समिद्धं । भुत्तुत्तरेण य भणिओ लक्खणो रामेण – 'पेच्छ वज्जयन्नेण अण्णायगुणसरूवाण वि अम्हाण पयच्छियं परमभोयणं । धम्मिओ य एसो महाणुभावो आवयावडिओ य । जुत्तो य उवयारस्स पच्चुवयारो सुपुरिसेहिं काउं । ता लक्खण ! गंतूण भणसु सीहोयरं जहा - वज्जयण्णेण समं पीईए ववहरसु । मा एयं कयत्थेहि अम्ह वयणेणं' ।
तओ 'जहाऽऽणवे[ह] 'त्ति भणिउं गओ लक्खणो । भणिओ य सीहोयरो तेण - ‘भरहेण अहं दूओ विसज्जिओ तुम्ह पासे इमं च भणाविउं जहा - एत्थ समुद्दपज्जताए मेइणीए अहं राया । ता मा कुणसु वज्जयण्णेण समं विरोहं' । तेण भणियं – 'किं भरहो न जाणइ गुणदोसे ? जहा किल विणयजुत्ताणं चेव भिच्चाणं पहू पस(सि)ज्जंति मि(त्ति) ? मम उण एस वज्जयण्णो न वट्टइ आणाए, जओ मम पणामं पि न समायरइ । ता से(सि)क्खवेमि एयं । किं भरहस्स इमाए तत्तीए ?' तओ भणियं लक्खणेण - 'किं एत्थ बहुणा परिजंपिएण ? एयस्स खमेयव्वं सव्वं पि मम वयणेण' । तेण भणियं – 'अच्छउ ताव वज्जयन्नो, जो तस्स पक्खवायं वहइ सो वि मए हंतव्वो' । तओ लक्खणेण भणियं - 'कुणसु वज्जयन्नेण समं संधिं मरणं वा पडिच्छसु । नत्थि ते जीवियं जो खलसि भरहस्स आणं' ।।
तओ सोउमेवं कुविओ सबलवाहणो तग्घायणत्थमुट्ठिओ सीहोयरो । लक्खणेणाऽवि गयालाणखंभे(भं) उम्मूलिऊण तस्स सव्वं पि लोट्टावियं बलं । तओ विज्जुक्खित्तकरणेणाऽऽरोढुं गयवरारूढो पोत्तावेडयं गले दाऊण कड्डिओ सीहोयरो । 'किं किमेय'ति चोज्जियस्स दसउरजणस्स पागारमारुहित्ता पलोयमाणस्स नीओ रामदेवसयासं । तओ सीहोयरो दट्ठण रामदेवं पणमित्ता य भणइ - 'देव ! न तुब्भेत्थ अच्छंता मए विण्णाया । ता संपयं समाइससु जं मम भिच्चस्स किच्चं' । रामदेवो भणइ – 'कुणसु वज्जयन्नेण सह संधि' । सीहोयरेण भणियं – 'जं देवो आणवेइ' ।
तओ रामेण हक्कारिओ वज्जयन्नो । सो वि देवे नमंसिऊण समागओ राममूलं । भणइ – 'कुसलं तुम्हं ?' रामेणाऽवि 'कुसलं तुम्ह दंसणेणं'ति संभासिऊण भणिओ – 'उवविसह' । उवविट्ठो । तओ भणिओ - 'किं संपयं सीहोयरस्स कीरउ ?' वज्जयन्नेणाऽवि सविवेयत्तणओ विन्नायवुत्तंतेणं भणियं - 'नाऽहमिच्छामि कस्स वि जीवस्स पीडं, ता पसायं काऊण मुंच सीहोयरं' । तओ रामेण 'मुक्को सि' त्ति भणमाणेण मुक्को सीहोयरो । सो वि य 'महापसायं' ति भणमाणो कयप्पणामो उवविट्ठो रामस्स पुरओ। तओ पसंसिओ सव्वेणाऽवि जणेण वज्जयन्नो विसेसओ रामेणं । तओ दोण्ह वि रामेणं कराविया निक्कवडसंधी । दिण्णाओ अट्ठ नियकण्णगाओ वज्जयण्णेणं लक्खणकुमारस्स । सीहोयरेणाऽवि सामंतसहिएण दिण्णायं(इं) लक्खणस्स तिण्णि कण्णगासयाई ।
तओ लक्खणेण भणियं – 'अच्छंतु ताव एयाओ कण्णगाओ तुम्हं चेव पासे जओ भरहो अम्ह
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |