________________
[१५०]
निक्खंतो नंदिघोसो। तओ कालं काउं गेवेज्जेसु देवो जाओ । नंदिवद्धणो वि सावगो पालियरज्जो मरिऊण बंभलोए देवो जाओ।
'तओ चुओ अवरविदेहे वेयड्ढपव्वए उत्तरसेढीए ससिपुरे नयरे रयणिमालिस्स विज्जाहरस्स विज्जुल(ल्ल)याए भज्जाए सूरंजओ [नाम पुत्तो जाओ ] । अण्णया य रयणमाली वज्जनयणविज्जाहरोवरि रणत्थं चलिओ सीहउरं नाम नयरं पत्तो । तत्थ य तं सीहउरं विज्जाए पलीविउमाढत्तो रयणमाली । एत्थंतरंमि य भणिस्समाणोवमच्चो(न्नो)वरोहिय जीवदेवेण सहस्सारदेवलोगाउ दिण्णोवओगेणाऽऽगंतुं भणिओ रयणमाली -
___ 'महाणुभाव ! मा मा महापावं एवंविहं समायरसु । जओ अण्णजम्मे वि तुमं भूरिनंदणो नाम राया आसि । कया य निवित्ती तए मंसभक्खणस्स । तओ पुण उवमच्च( नु)नामेणुवरोहिएण भंजाविओ मंसनियमं । खाविओ मंसं । उवमच्चो(न्नो)वरोहिओ वि कया वि मारिओ खंदनामेणं पुरिसेणं । तओ गयवरो जाओ । सो वि य गहिओ भूरिनंदणेणं । तओ गयवरो वि मारिओ संगामे तस्सेव भूरिनंदणस्स रन्नो गंधाराए देवीए अरिसूयणो नाम पुत्तो जाओ । सो य सं[जाय]जाईसरणो पव्वइओ मरिऊणुववण्णो सहस्सारे देवो । सो य अहं ति । भूरिनंदणो वि मरिउमरण्णे अयगरो जाओ । तत्थ वि वणदवदड्डो मरिऊण बीयपुढवीए नेरइओ जाओ । तत्थ य मए तुमं गंतुं पडिबोहिओ । तओ उव(व्व)ट्टो समाणो इह रयणमाली तुमं जाओ त्ति । ता नाऊणेवं मा मंसनियमभंगमिव संपयं पि कुणसु मुहा पावमिमं' ।
_ 'तओ सोउमेवं नियत्तो संगामाओ रयणमाली । कुलनंदणं नाम पुत्तं रज्जे ठवेत्ता सह सूरंजएण नियपुत्तेणं तिलयसुंदरसूरिसमीवे निक्खंतो । काऊण य तवं मरिऊणुववण्णा दो वि जणा सुक्कदेवलोए । तओ सूरंजयदेवो चविऊण तुमं दसरहो नाम राया जाओ । रयणमालिदेवो वि चविऊण मिहिलापुरीए जणओ नाम राया जाओ । अरिसूयणदेवो पुण सहस्साराओ चुओ जणयभाया कणगो नाम जाओ । जो उण दसरह ! तुह पुव्वि नंदिवद्धणजम्मे नंदिघोसो नाम पिया कयपव्वज्जो गेविज्जेसुं गओ आसि सोऽहं नंदिघोसदेवो चविऊण संपयं सच्चभूई नाम सूरी जाओ' । तओ सोउमेवं निव्वित्तो(न्नो) दसरहो कयपव्वज्जाभिप्पाओ वंदिऊण सूरिं समागओ राउलं ।
तत्तो सामंतजणं, आमंतेऊण सेवगजणं च । अंतेउर-पउरजणं, संभासइ सो जहानायं ॥ सुयवग्गं पि असेसं, रामं तह लक्खणं च भरहं च ।
तत्तो निक्खमणत्थं, पुच्छइ तं परियणं सव्वं ॥ भरहो भणइ – एवं संभासेंतं, दसरहं दट्ठण विरागमावण्णो ।
'ताय ! तए चेव सहाऽहमवि पव्वइस्सामि'त्ति ।। कयभिप्पायं चेवं, भरहं नाऊण केगई मुणइ । 'न य मे पई न पुत्तो, पव्वज्जाउज्जया दो वि' । इय चिंतिउं मणेणं, गंतुं विणएण भणइ नरनाहं । तं केगई 'नरीसर !, अज्ज वरं मम पयच्छेह ।।
