Page Text
________________
[१४६]
NNNNNNNNNNNNNNNNNNNNNNNNN
बालचंदेण सामंतेण अवक्खंदं दाऊण बद्धो छलेण । लूडिऊण अधणीया पल्ली, विहाडिओ दिसोदिसिं पि(प)ल्लिजणो । कुंडलमंडिओ वि समप्पिओ आणिऊणं दसरहस्स । तेणाऽवि सम्माणिओ बालचंदो । मुक्को य बहुणा कालेण कुंडलमंडिओ पुणरवि रज्जासाए भममाणो महीए दटुं मुणिचंदसाहु(मुणिचंदसाहुं) सुयधम्मो सावगो जाओ । तओ रज्जाहिकंखी चेव मरिऊण इहेव जंबुद्दीवे भारहे वासे मिहिलाए नयरीए जणयस्स रण्णो विदेहीदेवीकुच्छीए पुत्तत्तेणं समुववण्णो त्ति । तहा एयस्सेव जमलगब्भत्तेणं सा [स]रसादेवी संसारं हिंडित्ता वेगवइ(ई) नामोवरोहियधीया होऊण कयपव्वज्जा बंभलोए गंतुं चुया धीया संभूया । जायाइं दो वि नियसमएणं ति ।
सो वि पिंगलगसाहू तंमि समए मरिऊणुववण्णो सोहम्मे देवो । पेच्छइ य अवहीए तं कुंडलमंडियं पुत्तत्तेणुववणं । तओ पुव्ववेराणुबंधओ समुप्पण्णरोसेणाऽवहरिओ सो तेण पुत्तो । चिंतियं च - 'मारेमि एयं इमंमि सिलायले पहणिऊण । अहवा किं वइरनिमित्तेण पुणरवि इमेण मारि[ए]ण ? जओ लद्धविबुहभावस्स न मम इमं जुत्तं अणारियायरियं काउं । तो वेयड्ढे नगवरे रहनेउरचक्कवालपुरे अपुत्तस्स चंदगइखेयरस्स इमं समप्पेमि' ।
समप्पिओ य भणिऊण - ‘एस मए तुज्झ अपुत्तस्स पुत्तो दिण्णो' । तेण वि जायहरिसेण पुप्फवईए नियभारियाए समप्पिओ भणिउं – 'एस देवयाए तुह पुत्तो दिन्नो' । सा वि गहिऊण परमहरिसेण पविट्ठा सूयाहरं । पहाए य पयासिओ लोयाणं पुत्तजम्मो । कयं वद्धावणयं । सो य तणुपहाहिं पहासेइ दिसामंडलं तेण भामंडलेत्ति कयनामो बहुधाईपरिवुडो सुहंसुहेण तत्थ वड्डिउं पयत्तो त्ति ।
इओ य सा विदेही तंमि अवहरिए बाले गहिया महासोएण परुण्णा घोरंसुएहिं सदुक्खं विलविग्गा(त्ता) बहुप्पयारं । संठविया य जणएण भणिऊण - 'निरिक्खामि अवस्सं ते सुयं' । पेसिया य दिसोदिसिं दसरहपमुहनरीसराण लेहा । निरिक्खिओ य सव्वायरेण सव्वेहिं दसरह-जणयपमुहेहिं । न कहिं पि पउत्ती उवलद्धा । अवगयं च कालेण विदेहीए सुयदुक्खं । जेण -
आवाए अइदुस्सा(स)हं दुक्खं सव्वं पि होइ देहीणं ।
गयवेयणं तु पच्छा दीहरकालेण पम्हुसइ ।। तओ सा धीया कयसीयाहिहाणा साइसयकलाकलावसहिया वधि(ड्डि)या देहोवचएणं सुहंसुहेणं ति।
इय तं देह-कलाहिं, बद्धत(वडत) पेच्छिऊण अणवरयं । जणयस्स मणे चिंता, जाया – 'किल कस्सिमा देया ?' | अणवरयं रायसुए, गुण-रूव-कलाकलावनियरेहिं ।।
सह मंतीहिं वियारइ, न य पेच्छइ तीए परितुल्लो ॥ इओ य एयंमि अंतरे अद्धबब्बरएहिं आयरक्खिय(रंग)रायपमुहेहिं लूडिओ जणयदेसो। असमत्थो जणओ तेसिं जुज्झो(ज्झे) । तओ हक्काराविओ दसरहो । तंमि य पयट्टे विण्णविऊण रामदेव-लक्खण -भरह-सत्तुहणा पत्थिया सहसाहसेणं । संजायं दारुणं मका(हा)रणं सह अद्धचच्चरे(बब्बरे)हिं । विणिज्जिया य रामदेव-लक्खणेहिं, कया य हयविप्पहया नट्ठा य, विणट्ठा सेसा दिसोदिसिं अद्धच्चरगा(अद्धबब्बरगा) । तओ सत्थीहूए जणयदेसे पुणो वि पुव्वट्ठिईए वसिया गाम-नगराईय त्ति ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |