Page Text
________________
[१२८]
काऊण दो वि रज्जं, पव्वज्जं गेण्हिऊण य सुमित्तो । उववण्णो ईसाणे, तओ चुओ महुरनयरीए । हरिवाहणस्स पुत्तो, महुनामो; हिंडिऊण पभवो वि । विस्सावसु-जोइमई-पुत्तो जाओ सिरिकुमारो ॥ सनियाणतवं काउं, चमरिंदो होउमवहिणो(णा) नाउं । तुट्ठो तिसूलरयणं, पयच्छइ महुकुमारस्स ।। सो महुरनयरिराया, समहू हरिवाहणो समागंतुं । रावणमभिन्न(न)मइ तओ, सो वि य हरिवाहणं भणइ । 'एसो सो तुह पुत्तो महु-नामो जेण सूलवररयणं । लु(ल)द्धं चमरिंदाओ जं किर दो जोयणसहस्सो(स्स) ॥ गंतूणं कयकज्जं, पुणरवि हत्थट्ठियं हवइ पच्छा ?' । तेण वि भणियं – “एसो, मम पुत्तो जेण तं लद्धं' । इयं तं गुणगणगरुयं, दटुं दिन्ना मनोरमा नाम ।।
दहवयणेण नियसुया, परिणीया सा य महुण त्ति ॥ इत्थंतरंमि य इंददिसावालेणं नलकूबरेण पेसिओ रामणस्स दूओ भणावियं च – 'बहवे तए विज्जाहररायाणो वसीकया । संपयं ममाऽवि फुरणं पेच्छसु' । तओ सोउमेवं रावणो विसज्जियदूओ सबलो समागंतुमावासिओ दुल्लंघपुरासन्नो, पेसिया य कुंभयण्ण-विहीसण-सुग्गीव-पहत्थपमुहा बहवे भडा नलकूवरगहणत्थं । तेणाऽवि ते संपत्ते नाउं विज्जामओ अग्गिरूवो जोयणसयपरिमाणो विरइओ पायारो । कयाणि य जलणपउराइं रिउभडखयजणगाइं । ठिओ य तं समस्सिओ नियभडसमेओ नलकूबरो।
समागया य ते रक्खसभडा, असमत्था य लंघिउं तं पायारं । अल्लीयमाणा य हम्मंति नलकूबरभडनिवहेण । तहा वि ठिया तं वेढिऊण चाउद्दिसिं, कहावियं च इमं रामणस्स - 'दुग्गमपाराइयं, न समत्था किंचि इमस्स विप्पियं काउं । हम्मंति य अम्ह भडा इमेहिं । ता किं कीरउ ?'
इमं च निसामिऊण मइपगब्भमंतिसमेओ उवाउं(ए) मंतिउं पयत्तो रावणो । एत्थंतरंमि य नलकबरभज्जाए उवरंभाभिहाणाए पेसिया दओ(ई) भणियं च - 'देव ! तुम्ह गणावज्जियहियया उवरंभा घरवासेणं पविसिउकामा. ता तीए को आएसो ?' तओ रावणेण सोउमेवं 'परकलत्तमगम्मं सप्परिसाणं'ति सुमरिऊण वि कज्जत्थिणा भणिया दूई - 'भद्दे ! अच्छउ तावोवरंभा जा दुल्लंघपुरं पविसामि । अन्नं च एत्थाऽडवीए न किंचि कीलाय(प)मोयट्ठाणमत्थि । तहाऽहमवि दुल्लंघउरगहणत्थमुज्जयचित्तो चिट्ठामि' ।
तओ गंतुमेयं दूईए निवेएइ(निवेइयं) उवरंभाए । सा वि मयणाउरा झड त्ति समागया रावणसमीवं, भणइ य - 'नेमं नयरं केणाऽवि घेत्तुं तीरइ । ता गिण्ह इमं वे(आ)सालिं नामा(म) विज्जं, जेण सुहेणेव घेत्तुं दुल्लंघपुरं मम समीहियसंपाडणपरो होसि' । रावणेणाऽवि तं विज्जं घेत्तुं भग्गं दुल्लंघउरं । गहिओ नलकूबरो जुज्झमाणो विभीसणेण । जायं च तं नयरं सवसं, पुणो दिन्नं दसाणणे[ण] नलकुब्बरस्स । उवरंभा वि 'तुमं मम विज्जादायगा गुरुट्ठाणे वट्टसि उत्तमकुलप्पसूया य, जओ कामद्धय-सुंदरीणं धूया। ता अक्खंडियसीला भुंजसु भत्तुणा पवरभोए'त्ति भणिऊण संपूइऊण य समप्पिया नलकूबरस्स । सो वि
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |