Page Text
________________
[११८]
इय भणिओ सो दाउं, बहुसत्थ-पयत्थ-नीइपरिकुसलो ।
तं कण्णगं नमस्स(नहंसि?) गओ वलिओ निययंमि नयरंमि ।। कित्तिधवलेण य भणिओ सिरिकंठो नेहेण विओयमणिच्छमाणेण जहा - 'वेयड्डे तुम्हमत्थि बहवे वेरिया । तम्हा रक्खसदीवस्सेमस्साऽऽसन्नो अवरुत्तरदिसाए तिजोयणसे(स)यमाणो वानरदीवो नाम अत्थि दीवो । तस्संठियकिक्किंधपव्वयओवरि निम्मियमहापुरो सपरियणो सुहं चिट्ठसु' । तं च पडिवज्जित्ता कित्तिधवलसहिओ गओ तत्थ सिरिकंठो । ने(निय?)विज्जासामत्थनिम्मियंमि रमणीए किक्किंधपव्वइ(य)ओवरिं किक्किंधपुरे अहिसित्तो कित्तिधवलेण सिरिकंठो रज्जमणुपालइ त्ति ।
दिट्ठा य तंमि दीवे, महंतदेहा फलासिणो बहुसो । सिरिकंठेण भमंता, बहुजूहा वानरा रम्मा । घोसाविऊण अमारिं, दवावियं तेसि खाण-पाणाई । वा(अ)सेसखेयरेहिं वि, सम्माणिज्जति ते निच्चं ॥ रंगे चित्ते ल(ले)प्पे, गिहेसु बाहिं च सच्चविज्जति । करेंति निययपडाया-तोरण-धय-चिंध-छत्तवरि ॥ एवं च जेऽहिसित्ता, वानरदीवंमि कित्तिधवलेण ।
वानरचिंधा विज्जा-हरा वि ते वानरा जाया ॥ तओ सिरिकंठस्स पच्छोप्पयंमि मुणिसुव्वयतित्थे वट्टमाणे किक्किंधपुरे महोदहिरवो नाम राया जाओ। ता(तहा) कित्ति[ध]वलरायस्स पच्छोप्पए तंमि कुले लंकापुरीए तडिकेसो नाम राया जाओ । भुंजंति य ते दो वि नेहनिब्भरा नियनियरज्जाई ।
अण्णया य तडिकेसो सह अंतेउरेण रज्जेणे(उज्जाणे) गंतूण पवरकीलाहिं कीलिउं पवत्तो । तत्थ य कीलणासत्ताए तडिकेसरण्णो अग्गमहिसीए पु(दु)माओ पडिज्ज(ऊ)णोवरिं पवंगमेण करिसियं सिरिचंदाए पओहरजुवलं नहेहिं । तं च दट्ठण रण्णा तडिकेसेण पहओ बाणेण पवंगमो । सो य गुरुपहारवेयणासमइक्कंतो पडिमं ठियस्स साहुणो सयासं गंतूण पडिओ । साहुणो(णा) वि से दिन्नो पंचनमुक्कारो । नमोक्कारपहावेण य मरिऊणोदधिकुमारो देवो भवणवासी उववन्नो । तओ सरिउं पुव्वजम्मं समागओ साहुवंदणवत्तियाए ।
पेच्छइ य वंदिऊणं, तं सो तडिकेसखेयरभडेहिं ।
सेसे वि य हम्मंता, पवंगमा निद्दयं असुरो ॥ तओ दट्ठण आसुरत्तो ठिओ वियाणेण महापमाणवानरभूतो उम्मूलियतरु-सिलासमूहो ते रक्खसभडे पडिहणिउमाढत्तो । तडिकेसेणाऽवि णाऊण दिव्वपओगं गहियधूयकडुच्चुयहत्थेण होऊण आराहिओ पेसलवयणेहिं देवो । भणिओ य - 'को तुमं ? पच्चक्खो होसु' । तओ समुवसंतो देवो । कहिओ निययवुत्तंतो नमोक्कारपभावाईओ सयलो वि । तओ तडिकेसो देवो य गया तस्स मुणिणो सयासे। वंदित्ता य सो मुणी पुच्छिओ तडिकेसिणा वानरवइरकारणं । भगवया भणियं – 'सुण, सावत्थीए नयरीए मंतिपुत्तो दत्तो नाम निक्खंतो विहरमाणो, पत्तो वाणारसीए पुरीए । व(त)त्थ ठिएण य आडेहिएण(आहेडिएण) दट्ठमवसउणो त्ति विणासिओ माहिंदे गंतुमिह तुमं तडिकेसो जाओ आहेहि(डि)ओ वि न[र]ए गंतुमिह वानरो जाओ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |