Page Text
________________
[१०९]
वेयड्ढे सूरोदयं अत्थि नयरं । इंदधणू नाम तंमि विज्जाहराहिवई परिवसइ । भज्जा य सिरिकंता धूया य जयचंदा । सा य पुरिसवेसिणी, न इच्छइ किंपि पवरं पि य वरं । तओ नरवइभणियाए मइ पट्टियालिहिया दंसिया तीए सव्वे वि भरहनरिंदा । न य तेसिं कोई अभिरुएइ। अन्नया तुम्ह रूवं मए दंसियं । तओ तुह-रूयदसणाणंतरमेव गहिया कामावत्थाए । भणिया य अहं तीए – 'जइ ममं एस भत्तारो न संपज्जइ ता अवस्सं मए मरियव्वं । अवस्सं जावजीवं निवत्ती पुरिसस्स । इमो य वइयरो मए साहिओ तीए जणणि-जणयाणं । तेहिं अहं तुम्ह आणणनिमित्तं पउत्ता । तओ तीए पुरओ इमा पइण्णा मए गहिया - अवि य -
जइ तं न आणेमि अहं कह वि कुमारं अइप्पियं तुज्झ ।
ता जालिंधणजलिए जलणंमि धुवं पविस्सामि ॥ संपयं च जइ तुम्ह पसाएण न मम मरणं संपज्जइ पइन्ना य निव्वहइ ता कुमार ! सव्वं सोहणं न अन्नहा' ।
तओ अणुन्नायाए नीओ तीए महापउमो सूरोदए नयरे । निवेइओ अवीससंतीए पुर[ओ] खयराहिवस्स । तेण सम्माणिऊण पवरदिवसे कराविओ पाणिग्गहणं समं तीए कन्नाए । पूइया वेगवई जयचंदाए ।
इओ य जयचंदाए माउलभाउगा गंगाहर-महिहरा नाम विज्जाहरकुमारा अइपयंडा मुणिऊण इमं वइयरं भडचडयरसमेया समागया अन्नंमि दिणे संगामनिमित्तं सूरोदयपुरवरे । सोऊण य महापउमकुमारो तेसिं आगमणं सह विज्जाहरभडेहिं नीसरिओ तेसिमभिमुहो । संपलग्गं रणं । अवि य -
जुझंमि समावडिए न संदणो कुंजरो तुरंगो वा ।
सुहडो व्व(य) परबलंमी महपउमेणं न जो विद्धो ॥ एवं च भयविहलं जाणिऊण निययबलं भग्गा गंगाहर-महिहरा ।
महापउमो वि संपत्तजओ समुप्पन्नचोद्दसरयणो लद्धनवनिही बत्तीसनरीसरसहस्ससेविज्जमाणो परिणिएगूणचउसट्ठिसहस्संतेउरो हय-गय-रह-पाइक्क-कोससंपन्नो पसरियपयावो जाओ नवमचक्कवट्टी त्ति । अवि य -
छक्खंडभरहरज्जं मन्नइ सो नीरसं समिद्धं पि ।
मयणावलीएँ रहियं जणमेजयरायदुहियाए । तओ आसमपयंमि गयस्स तावसेहिं विहियसम्माणस्स पवरपुप्फ-फलाइएहिं सयधणुपुत्तेण दिन्ना जणमेजएणं महापउमचक्कवट्टिणो मयणावली, परिणीया य महापमोएणं । तओ महाविभूईए चक्कवट्टिरिद्धिसमेओ गओ हत्थिणारं नयरं । पविट्ठो य थुव्वमाणो बंदियणेण । वंदिया य तेण दट्ठण जणणि-जणया । तेहिं य समाइच्छिओ गुरुनेहेणं ति ।
एत्यंतरंमि य तत्थेव समोसरिओ मुणिसुव्वयसामी(मि)सीसो सुव्वओ नाम सूरी । तओ निग्गओ सपरिवारो पउमुत्तरो राया वंदिऊण य तं निसन्नो । भयवया वि कया रन्नो भवनिव्वेयजणणी धम्मदेसणा। राया वि तं सोउं भणइ – 'भगवं! जाव रज्जसुत्थं करेमि ताव तुमंतिए पव्वइस्सामि' । तओ ‘मा विलंब कुणसु'त्ति भणिओ सूरिणा पुण वि पणमिऊण गुरुं राया पविट्ठो नयरिं । तओ वाहरिया मंतिणो सह
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |