Page Text
________________
NNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNN
[१०२] चंदच्छायरायं । भणिया य रण्णा – 'कुओ एयमच्छेरयभूयं कुंडलजुयलं?' तओ कहिऊण सव्वं वित्तवुत्तंतं विसेसेण वण्णिओ मणि(ल्लि)कण्णगारयणरूवाइसओ । तओ चंदच्छाएण वि परोक्खाणुरागओ तीए वरणत्थं पेसिओ कुंभगस्स दूओ त्ति ।
३ - इओ य पूरणदेवो विजयाओ चइत्ता कुणालदेसे सावत्थीए नयरीए रूप्पी नाम राया जाओ। तस्स धारिणी नाम देवी, सुबाहु नाम धीया । एसा इ(य) अईववल्लहत्तणओ सया वि चाउम्मासिएणं विसेसमज्जणएणं मज्जिज्जइ त्ति । अण्णया य सा सुबाहू मज्जणमंडवे विसिट्ठपट्टोवरि निसण्णा सव्वंतेउरियाहिं एहविऊण महाविभूईए कयकोउयसव्वालंकारा पिउयपायवंदणत्थमुवणीया । वंदियपाया य साऽपि रन्ना उच्छंगे निवेसिया । तओ महल्लगो भणिओ – 'भो भो ! तुमं ममाऽऽएसेण बहुदेसंतरेसु जासि । दिट्ठो य तए कत्थ वि एरिसकन्नारयणस्सेरिसो मज्जणविही ?' तओ महल्लेगेण भणियं - 'देव! तुज्झ पेसणेणाऽहं मिहिलाए गओ । तत्थ कुंभगरायजायस्स कन्नारयणस्स आउगंठीए जो मज्जणविही मए दिवो तस्सेसो लक्खंसेण वि नाऽणुहरइ' । तओ जायाणुरागेण रूप्पिराएण तीए वरणत्थं पेसिओ कुंभगस्स दूओ त्ति ।
४ - इओ य वसुदेवो विजयाओ चइत्ता कासीजणवए वाणारसीए नयरीए संखो नाम राया जाओ। इओ य मल्लीए तं पुव्वदिण्णं विसंघडियं देवनिम्मियं कुंडलजुयलं । तस्संघडणत्थं कुंभगेण रण्णा सुवण्णयारा समाइट्ठा । तओ ते निरूवित्ता भणंति – 'देव ! न सक्केमो संघडिउमिदं कुंडलं' । तओ रुटेणाऽऽणत्ता निव्विसया ते मिहिलाओ निग्गंतूण वाणारसीए संखस्स पुरओ विन्नत्तनियवुत्तंता विसेसओ वक्खाणियमल्लिकण्णारयणरूवाइसया वसिया । तओ समुप्पण्णरागेण संखेण मल्लिकन्नारयणवरणत्थं कुंभगस्स दूओ पेसिओ त्ति ।
५ - इओ य वेसमणदेवो विजयाओ चइत्ता कुरुदेसे हत्थिणाउरे अदीणसत्तू राया जाओ । इओ य कुंभगस्स रण्णो पुत्तो मल्लिलहुभाउगो मज्झो(ल्लो) नाम चित्तगरे सद्दावेत्ता चित्तसालियं करावेइ । तीए य चित्तिज्जंतीए एगो चित्तगरो निभं पि दटुं सव्वरूवलिहणरिद्धिसंपन्नो मल्लीए पायंगुटुं जवणंतरियं कहमवि दटुं सव्वंगोवंगेहिं साइसयं रूवमालिहइ । निप्फण्णा य चित्तसालिया । सम्माणिऊण विसज्जिया चित्तयरा । तओ मल्लकुमारो संतेउरो कीलणत्थं गओ चित्तसालियाए। दट्ठण य तत्थ मल्लि लज्जिओ ओसरिउमारद्धो । तओ धाईए भणियं – 'पुत्त ! किमेयं ?' 'अम्मो ! कि(क)हमेत्थ वाइयाए(भइणीए) समक्खं कीलिज्जइ ?' धाईए भणियं – 'पुत्त ! न एस सच्चिल्ला मल्ली, किंतु चित्तलिहिया' । तओ रुट्ठो मल्लकुमारो मल्लिचित्तयरं सद्दावेइ, दाहिणहत्थसंडासगं छिंदाविऊण निव्विसयं आणवेइ । ताहे सो मल्लिचित्तगरो मिहिलाओ निग्गंतूण हत्थिणारं गओ । कहिओ सव्वो वि नियवुत्तंतो अदीणसत्तुरायस्स । रण्णा भणियं – 'केरिसी सा मल्ली ?' तओ चित्तयरेणं चित्तफालय]लिहिया कक्खंतराओ कड्डित्तु दंसिया। भणियं च - 'देव ! निभमेत्तं चेव लिहियं, न उण परमत्थओ को वि मल्लिकन्नारयणसरूवमालिहिउं समत्थो' । तओ अदीणसत्तुराएण संजायरागेण तीए वरणत्थं कुंभगस्स पेसिओ दूओ त्ति ।।
६ - इओ य अभिचंददेवो विजयाओ चइत्तु पंचालदेसे चंपयाणदवीए(कंपिल्लनगरे) जियसत्तू नाम राया जाओ। तस्स धारिणीपमुहं देविसहस्समंतेउरं । इओ य मिहिलाए तारका( चोक्खा?) नाम परिव्वाइया वियक्खणा मल्लिसमीवमागम्म सदब्भपाणएणं तं पएसं अब्भोक्खित्ता भिसियाए निसण्णा
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |