________________
[९८] पुंडरीयवासुदेव-भणिस्समाणदत्तवासुदेवाणं च विचाले अट्ठमो सुभूमचक्कवट्टि त्ति सुभूमचक्कवट्टिकहा भण्णइ -
इहेव जंबुद्दीवे भारहे वासे रिसहसामी नाम पढमतित्थयरो । तस्स पुत्तो कुरू, जस्स नामेण कुरुक्खेत्तो देसो। तस्स पुत्तो हत्थी जस्स नामेण हत्थिणाउरं पट्टणं जायं । तम्मि य बहुपुत्तपोत्ता(त्त)याइपरंपराए अणंतविरिओ नाम राजा जाओ। सो य मिगकोट्टयनगरसामि-जियसत्तुरायधीयाए धारिणीए सह विसयसुहमणुहवंतो चिट्ठइ त्ति ।
इओ य वरं(सं)तउरे नयरे उच्छिण्णवंसो अग्गिओ नाम दारगो । देसंतरं संकममाणो सत्थेण उज्झिओ तावसपल्लिं गओ । संगहिओ य पुत्तो त्ति काऊण जमाहिहाणेण तावसेण । तंमि य मए सो चेव तवं कुणंतो जमदग्गी नाम(मेण) पसिद्धिं गओ ।
इओ य कह वि तत्थाऽऽगया दो वि देवा वेसानर-धम्म(न्नं? )तरिनामे(मि)णो साह-तावसभत्ता भणंति – 'साहु-तावसे परिक्खामो' । सावयदेवो भणइ – 'जो अम्हं धम्माभिमुहो तुम्हें पुण सवु(ब्बु)त्तमो सो परिक्खिज्जउ' । एवं पडिवण्णा(ण्णे) मिहिलाए नगरीए अहिणवसावगो पउमरहो राया । सो चंपं वच्चइ वासुपुज्जसमीवे पव्वज्जानिमित्तं । सो य पडिकूलाणुकूलेहिं उवसग्गेहिं उवसग्गिओ वि न विपरिणामिओ। तओ सिद्धपुत्त[रू]वं काऊण भणिओ जहा – 'दीहमाउयं, मा ताव पव्वयसु' । तेण भणियं - 'विउला निज्जरा भविस्सई' ।
तओ तं मोत्तुं गया जमदग्गिसमीवं । कयसउणवेसा ठिया से कुच्चंमि । तओ माणुसभासाए भणिया सउणएण सउणिया – 'हिमवंतं गमिस्सामि' । सा न विसज्जेइ । 'तुममण्णो(ण्णा)सत्तो तत्थेव चिट्ठसि' । सो भणइ - 'गोघाय-बंभणघाए[हिं] सवेमि जइ तुरियं नाऽऽगच्छामि' । सा भणइ - 'न एएहिं सवहेहिं पत्तियामि, नवरं जइ एयस्स रिसिणो पावं गेण्हसि तो मुयामि' । सो य नेच्छइ एवं सवहं काउं । तओ रुटेण रिसिणा दो वि हत्थेहिं धरिऊण भणिया – 'रे रे अहमा ! किमहं पावं करेमि जेणेवं जंपह ?' ते भणंति – 'महरिसिपुत्तो तुमं । अवि य -
अपुत्तस्स गई नत्थि सेयो नेव य नेव य ।
गहिधम्ममणुट्ठित्ता, तओ सग्गं गमिस्ससि ॥ एवं च -
इ8 चिय विसयसुहं, पुणो य देवेहिं साहिओ धम्मो ।
एक्कं उम्माहियया, बीयं मोरेण लवियं ति ॥ संखुद्धो रिसी । पडिवण्णो मयरद्धएण ।
देवो वि सावगो जाओ । जमदग्गी वि गओ मिगकोट्टए । भणिओ जियसत्तू – 'मम कण्णगं देसु'। सावभीएण य दावियं कण्णाण सयं 'जा इच्छइ तं गेण्हसु' । तओ तं पिसायसंकासं दट्ठण - 'न लज्जसि विसए पत्थित'त्ति भणंतीओ ठियाओ सव्वाओ वि परम्मुहाओ कण्णगाओ । अवि य -
उवरोहयाइ कज्जं, कीरइ सव्वं पि जीवलोयंमि । पेमं पण इह उवरोहयाए भण केण संघडियं ? ।।
