Page Text
________________
[८३]
एवं भणिए जंपियं कामपालेण - 'पिए ! मज्झ तुमं चेव कज्जगुरु(रू), ता आदिस जं मए कायव्वं । केसरा उण तुमं पिव संगया पिययमेण । दुक्खं पुण मज्झं तुह दंसणकालरूढं पि चंदोदए व्व अंधयारं पणटुं तुह दसणोह(द)यंमि' । एवं भणिऊण ध(अव)णीया सीसदुवारिगा । 'कहं सो चेव मम हिययनंदणो ?'त्ति हरिसिय(या) मइरा, सज्झसेण संमूढा य एसा भणिया कामपालेण – 'सुंदरि ! न एसो कालो संमोहस्स अवि य उच्छाहपहाणस्स उवायस्स । ता को इह नीसरोवाओ? साहेउ सुंदरी(रि) ! जेण अम्हे अलक्खियाई लहुं नीसरामो' ।
मदिराए भणियं – 'जइ एवं ता लहुं चेव गिहुज्जाणपच्छिमदुवारेण नीसरामो' । ‘एवं' ति उट्ठओ कामपालो पाउक्खालियववएसेण नीसरितो मइराए गिहुज्जाणमु(म)झेण निग्गओ गेहाओ । घेत्तूण मं(म)दिरं पलाणो न[य]राओ वि। मिलिओ गयउरे केसरं गहाय नट्ठस्स वसंतदेवस्स । मिलियाओ केसरमं(म)दिराओ । साहिओ परोप्परवुत्तंतो । ठिया तम्मि चेव नगरे ।
तम्मि य राइणो कुरुचंदस्स पंच पंच ढुक्कंति ढोयणए णेगा[गा] राणि सव्वुत्तमवत्थ-फलाईणि । ताणि य अइसएण भोगंगाणि त्ति अच्चंगसन्नाणि ज्झो(सो) न कस्सइ देइ, चिंतेई य – 'एयाइं मए इट्ठविसिट्ठाणं द(दाय)व्वाइं', न भुंजइ सयं पि एगागी ।
अण्णया समागओ तत्थ भगवं संतिसामी तित्थयरो । कयं देवेहिं समोसरणं । निग्गओ राया कुरुचंदो वसंतदेवादओ य । साहिओ भगवया धम्मो । अहं(हि)णंदिओ एएहिं । पुच्छिओ य राइणा संतिसामी – 'भगवं ! किं मए कयं जंमंतरे जेणि[रि]सी संपत्ता रायसिरी ? केण वा कारणेण पंच अच्चंगाणि उवणमंति ? किं वा ण देमि ताणि अहं कस्सइ ? न [वा] भुंजामि सयं ? किं वा चिंतेमि "एयाणि मए इट्ठविसिट्ठाणं दायव्वाइं"ति ?'
भगवया भणियं – 'साहुदाणफलं रायसिरी, अच्चंगोम(व)णमणं पि एवं चेव । अदाणाभोयणेसु वि य अच्चंगाए(ण) कारणं साहारणपुण्णफलत्तं । न तेहिं अमिलिएहिं भोगो हवइ । चिंताए वि एवंविहाए इह(द)मेव कारणं । धण्णाण मग्गाणुसारिणी चेव चिंता हवइ' । एवं भणिऊण साहिओ पुव्ववइयरो । दंसिया वसंतदेवाइ ।
तओ सोऊणेवं नियचरियं, दंसणेण य परोप्परं जाइस्सरणेण य पडिबुद्धा सव्वे । तओ संतिनाहं वंदित्ता मिलिया चेव नीया नियगेहं कुरुचंदेण । कयमुचियकरणिज्ज । एवं च पुण्णाणुबंधे(धि)पुण्णप्पहावओ जहोधि(चि)यकिच्चुज्जया पंच वि भोगपरा सुहंसुहेण गमिऊण कालं कम्मपरिवागसमए सुगइमहाभायणो(णं) संपण्ण त्ति ।
कुरुचंदाइ त्ति गयं ।
एवं कुरुचंदाइपज्जुवासिओ संतिकेवली वरिसूणाणि पणुवीसं च वरिससहस्साणि जाव विहरेत्ता सम्मेयसेलसिहरे जिट्ठकिण्हतेरसीए सिद्धो त्ति । संतिनाहो त्ति गयं ॥
संतिजिणाओ य पलिओवमद्धेण छट्ठचक्कवट्टी सत्तरसमजिणो य कुंथुनाथो त्ति कुंथुनाथकहा भण्णइ
महापुरे वइसमणो राया संवरगुरुसमीवे विहियपव्वज्जो जाओ सव्वट्ठसिद्धविमाणे देवो । तओ
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |