Page Text
________________
[७६] तओ भद्दवयकण्हसत्तमीए चविऊणिहेव जंबुद्दीवे भारहे वासे हत्थिणाउरे नयरे वीससेणस्स रन्नो अइराए देवीए चोद्दससुमिणसूइओ संभूओ गब्भे । तओ जेट्टकण्हतेरसीए जाओ वरिसलक्खाऊ कणयवन्नो पुत्तो । गब्भत्थंमि य भगवंते महंतासिवोवढुए देसे संती समुप्पण्णा त्ति पिउणा पइट्ठिओ सो संती नाम । चालीसधणूसिओ य संतिकुमारो पणुवीसवरिससहस्सोवरि पणुवीसवरिससहस्साणि जाव मंडलिओ होऊण पणुवीसं चेव वरिससहस्साणि जाव चक्कवट्टी जाओ । तओ जेट्टकण्हचउद्दसीए निक्खंतो वरिसोवरि पोससुद्धनवमीए संपत्तकेवलो हरिणलंछणो वाम-दाहिणपासेसु निव्वाणीदेवी-गरुडजक्खपज्जुवासिज्जमाणो धम्मजिणतित्थवोच्छित्तीओ गए पलिओवमचउत्थभाए नियतित्थं पवत्तेइ ।
दढरहसाहू कयाणसणो देवलोगं गओ । तओ चुओ संतिजिणस्स पढमगणहरो जाओ । पव्वाविओ य संतिनाहेणोसहसेणो जो सिद्धो होउमिलाइपुत्तो त्ति ।
इलाइपुत्तकहा भन्नइ -
पुव्वदेसे उसहपुरे उसहसेणो राया । मयणप्पहा से महादेवी । तत्थ य समोसरियस्स संतिसामिणो समीवं गओ राया सपरिवारो । सुणेइ धम्म संविग्गो चित्तेण । एत्थंतरे समागंतुमेगो देवकुमारो भत्तीए सामिणो चच्चेइ चलणे गोसीसचंदणेणं पूइए(पूएइ) सुरतरुकुसुमेहिं । हरिसिज्जइ पुणो पुणो जिणदरिसणेण । तं च तहा दटुं जाणंतेणाऽवि [परिसा]गुणत्थं पुच्छिओ संतिसामी गणहरेण भगवं - 'को एस देवो भावियप्पा ?' भगवया भणियं – 'सुम्मउ जहेसो नरसुंदरदेवो'त्ति ।
नरसुंदरदेवकहा भण्णइ -
अत्थि अवंतीविज(स)ए उज्जेणी नाम नयरी । तत्थ अवंतिराओ नाम राया । बंधुमई से महादेवी । पिया अच्चंतमेयस्स । तेणिमीए सह परिचत्तरज्जकज्जो विसयसुहमणुहवंतो चिट्ठइ । अनायगं पिव सीयए रज्जं । सिक्खविओ सचिवेहिं - 'देव ! रज्जचिंताअविरोहेण जुत्तं विसयसुहसेवणं' । न पडिवण्णमेएण तओ आलोचियं सचिवेहिं - 'विणस्सइ रज्जमेवं । ता उज्झामो समं मि(म)हिलगाए । ठवेमो अण्णं एत्थ रज्जे' ।
अण्णया पाइऊण मज्जं तीए सह मत्तसुत्तो मंचएण छड्डिओ राया । बद्धा देवीए उवरि पोत्तचीरिगा। लिहियं तत्थ एयं – “सामि त्ति काउं न वावाइओ । गहियं रज्जमण्णेण । एयं नाऊण जहाजुत्तमणुचिट्ठियव्वं"ति । मयनिद्दाखएण पडिबुद्धो राया । दिट्ठा अडवी । 'किमेस सुविणगो'त्ति चिंतियमणेण । उवलद्धा रुक्खाई । विउद्धा देवी । तीए वि तहेव - 'न एस सुविणगो, ता किं पुण एयं ?'ति चिंतियमेएहिं दिट्ठा उत्तरिज्जे चीरिगा । वाइया दुवेहिं पि । अवगओ भावत्थो । वीररसपहाणयाए पयट्टो राया । धरिओ देवीए भणिओ य - 'सहायसज्झमेयं पओयणं । ता तामलित्तिं जाहि, जेणाऽहं निवेएमि नियभाउणो नरसुंदरस्स । तओ दिनपरिवारसहाओ करिज्जउ तुमं जहाजुत्तं' ।
_ 'एवं'ति पडिस्सुयमेएण । पयट्टाणि तामलित्तिं । पत्ताणि किलेसेण नयरिबाहिरिगाए । भणिओ देवीए राया – “चिट्ठ ताव तुमं एत्थ तलागतीरसंठिए रुक्खे जाव निवेएमि अहमेयं राइणो । तओ सो तुमं पवेसिस्सई' । ‘एवं'ति गया देवी। पत्ता पडिहारभूमिं । पच्चभिन्नाया चेडीहिं । निवेइयं नरसुंदरस्स । समागओ एस सम्मुहं । 'कहिं अवंतिराओ'त्ति पुच्छिया राइणा । 'नगरबाहिरिगाइ'त्ति साहियं बंधुमईए ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |