Page Text
________________
एत्यंतरंमि य जणणिपडिहारीए होऊण अग्गे विन्नत्तं जहा - 'कुमार ! परित्ताहि । पेच्छ जीवंते चेव महाराए किं ववसियं देवीए ? तओ ससंभंतो गओ कुमारो । दिट्ठा जणणी जलणपवेसणत्थमुज्जया परियण(णं) संभासमाणा य । भणिया गुरुदुक्खगलंतंसुणा कुमारेण जहा – 'अंबु(ब) ! तुमं पि मम(मं) मंदभायं परिच्चयसु(सि)?' तओ दट्ठण तं सविसेसविहियंसुवाया देवी – 'पुत्तय ! माणिओ महाराओ, पीयं तुम्हारिसेहिं छीरं । संपयं महारायविरहग्गिभीया जलणंमि पविसंती न तए किंचि वत्तव्व'त्ति वोत्तु निग्गया गिहाओ ।
तओ नीसहंगो गओ कुमारो पिउसमीवं । सो य गाढं पीडिओ त्ति मुक्को धरणीए । गुरुदुक्खं च कुमारं समीवमागयं नाऊण भणइ – 'पुत्त ! किमेवं कायरीहूओ ? संभरिज्जउ अप्पा, पडिवज्जिज्जउ रज्जधुराधरणधवलत्तं' – एवं च भणंतो नरवई पंचत्तमुवगओ । अत्थमिओ य दिणयरो । तओ पियरमुवरयं नाऊण सपरिवारो पुरिससीहो सयलभुवणंतेवालाणं पडिसदितो रोविउमारद्धो । पहाया य रयणी । तओ कयमग्गिसक्काराइयं सयलं पि करणिज्जं गहियमहासोएण पुरिससीहो(हेण) । पेसियाओ पवणवेगाओ वरियाओ(उट्टियाओ) सुदंसणस्स । ताहिं च समं वसीकयपवं(च्चं)तनरवई उ(झ)ड त्ति समागओ सुदंसणो। कयं कालोचियं किच्चं । चिट्ठति य सोयाउरा दो वि ।
दूइ(य)पेसणाइ कमेण य रन्ने विणासेत्ता निसुंभपडिवासुदेवो(वं) जाया दो वि बलदेव-वासुदेवा। भुत्तभरहद्धो य पुरिससीहवासुदेवो गओ अहोगई । तव्विरहमि य सुदंसणबलदेवो निक्खमित्ता सिद्धो त्ति । पुर( रिस )सीहवासुदेवो त्ति गयं ॥
___पुरिससीहवासुदेवपच्चक्खधम्मजिणस्स भणिस्समाणसणंकुमारचक्कवट्टिस्स य विचाले तईओ मघवंचक्कव[ट्टी त्ति मघवंचक्कव]ट्टिकहा भण्णइ -
इहेव जंबुद्दीवे भारहे वासे सावत्थीनयरीए समुद्दविजओ राया । तस्सा(स्स) भद्दानामिगाए देवीए चोद(द)ससुमिणसूइओ पंचवरिसलक्खाऊ मघवं नाम पुत्तो जाओ । सो य सड्डबायालीसधणूसिओ पुण्णोदएण समुप्पन्नचक्काइरयणा(णो) उ(अ)खंडं भरहं भोत्तुमंते विहियपव(व्व)ज्जो जाओ सणंकुमारकप्पे इंदसमाणिओ देवो त्ति मघवंचक्कवट्टि त्ति गयं ॥
मघवंचक्कवट्टि-भणिस्समाणसंतिचक्कवट्टीणं च विचाले चउत्थो सणंकुमारचक्कवट्टि त्ति सणंकुमारचक्कवट्टिकहा भण्णइ -
___ इहेव जंबुद्दीवे भारहे वासे कुरुजंगले जणवए हथिणाउरे नयरे आससेणस्स रण्णो सहदेवीए भज्जाए चउदससुमिणसूइओ तिवरिसलक्खाऊ सणंकुमारो नाम पुत्तो जाओ । सो य सक्के(ड्डे)क्कचत्तालीसधणूसिओ कयाइ संपत्ते वसंतसमए सूर-कालिंदीसुएण बालवयंसेण महिंदसीहेण सद्धिं गओ मयरंदमुज्जाणं । आढत्ता णाणी(णा)विहवसंतकीलाहि कीलिउं । तदवसाणे य समुद्दाविया(समप्पिया) तुरंगमवइणा नरिंदाईण जहारिहं तुरया । सणंकुमारस्स वि समप्पिओ हरितुरयाणकारी जलहिकल्लोलाभिहाणो आसो ।
तम्मि य आरूढो कुमारो । सो य सह सेसरायतणएहिं मुक्को समकालं । तओ चेवं(थेवं) भूमिभागं गंतूण उप्पइओ व्व रायमग्गे कुमारतुरंगमो । तओ असणीहूओ । लग्गो अविण्णायवुत्तंतो आससेणपरियणो पिट्ठओ । एत्थंतरम्मि य विन्नत्तो राया महिंदसीहेण – 'कुणउ पसायं महादेवो, नियत्तउ नियनयराभिमुहं
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |