Page Text
________________
सा भणइ - 'जहऽज्जउत्तेणेत्तियं नायं तहा सेसं पि जाणिस्सइ' ।
तओ खणंतरेणाऽहं मइसागरसहिओ गओ नियावासं । पुणो रयणिपहरुद्देसे जाव तहेवाऽऽगओ तगि(ग्गि)हं ताव कणगवई विसन्ना सहीहिं सह किंचिदफुट्ठ(ड)क्खरं जपंती भणिया एगाए दासचेडीए जहा – 'सामिणि ! समइक्कम्मइ वेला, रूसिही विज्जाहारो । ता कीरउ तत्थ गमणं' । दीहं च मी(नी)सस(सि)त्ता कणगवई भणइ – 'हलाऽहं मंदभाइणी किं करेमि? जा(ज)ओ तेण विज्जाहरनरिंदेणाऽहं कुमारभावे नेऊण सवहं कारिया जहा - जाव मए नाऽणुन्नाया ताव पुरिसो नाऽहिलसणीओ। पडिवन्नं च तं मए । विवाहिओ जणयाणुरोहओ मए रूवगुणखित्तचित्तीओ अज्जउत्तो । जाणिओ य विज्जाहरवइयरो कह वि तेण । विसमो य सो विज्जाहरं(रो) । ता न जाणे का गई भविसउ(स्सइ)त्ति चिंताउरं मि(मे) चित्तं'।
तओ दासचेडी भणइ – 'जइ एवं ताऽहं चेव तत्थ जामि, साहिस्सामि य तस्स जहा - सामिणीए सीसं दुक्खइ । तं च सोउं जमणुचिट्ठिस्सइ तयणुसारेण जि(जा)णिस्सामो तस्साऽभिप्पायं' । तओ सुइरं चिंतित्ता भणिओ(उं) – 'चे(ए)वं कुणसु'त्ति विउव्वियं कणगवईए विमाणं, तम्मि य चडिया चेडी । तओ 'सोहणं कयमिमीए । फेडेमि तस्सऽज्ज पेक्खणयधायं' [ति] चिंतिऊणाऽहं पि चडिओ तक्कोणे य तत्थ विमाणे । पुच्छिया सेवगविज्जाहरेण चेडी - 'किमुसू(स्सू)रे तुममागया ? कहिं वा कणगवई ?' चेडीए भणियं – 'न सोहणं सरीरं कणगवईए । तेणाऽहं पेसिया' ।
त(तं) च सोउं रुट्ठो विज्जाहरिंदो – 'तुम्हे करेह पेक्खणयं, अहं तीए सरीरं सोहणं करिस्सामि'त्ति वोत्तुं नीसरिओ देवहरयाओ समुक्खयखग्गो, को(के)सपासे घेत्तुं चेडिं भणइ – 'करेमि ताव तुह स(रु)हिरेण नियकोहग्गिविज्झावणं, पच्छा करिस्सामि तुह सामिणीए जमुचियं' । तओ चेडी भणइ - 'पुव्वमेवेदं जाणियं जहा तुम्हारि[स]सेविएहिं किमण्णं पावियव्वं?' तओ गाढयरं रुट्ठो विज्जाहरिंदो भणइ - 'दुढे ! सुमरह इट्ठदेवयं' । चेडी भणइ – 'सामिरिसहेसरं मोत्तुमिमाए अडवीए नऽन्नो को वि विज्जए सरणं, तहा वि ममऽज्जउत्तो सरणं' । विज्जाहरिंदो भणइ – 'निब्भागिणि ! को सो अज्जउत्तो ?' चेडी भणइ - 'जेण नियगुण-सू(रू)व-विक्कम-गुणावज्जिया परिणीया मे सामिणी, तहा केण वि पओगेण तुमं पि जेण जाणिओ।'
सोउं चेमं कोवंधो विज्जाहरिंदो 'नत्थि ते अहमे ! [ए] यस्सरणेणऽज्ज जीविय'ति जंपंतो जाव खग्गेण हणिउं पवत्तो चेडिं ताव 'रे रेपुरिसाहम ! कुणंतो घायमबलाए न लज्जसि'त्ति हक्किओ मए वलिओ सम्मुहो, खग्गमग्गकुसलेण य बहुविहं पि गुणवंतो छिन्नसीसो विहिओ । तओ भीओ विज्जाहरिंदपरियणो जाव मए समासासिओ तावाऽऽगयाओ ताओ वि ममंऽतियं तिन्नि कन्नगाओ भणंति - 'मोयावियाओ जमिमाओ विज्जाहरपिसायाओ. तेणऽम्हं पि तमं चेव सरणं' । मए भणियं - 'काओ तुम्हे ?' ___तओ तासिमेगा भणइ – 'संखउरे दुल्लहरायस्स बी(धी)याऽहमेयस्स भएणाऽणिच्छे(च्छि)यविवाहा कन्नगा चेव चिट्ठामि' । मए भणियं – “किं नेहेणऽन्नहा वा ?' सा भणइ – 'कओ नेहो ? जओऽहं कुट्टिमतलाओऽणेणाऽवहरिया व(वि)लवंती य विणासिउकामस्स निल्लालियजीहा पंचंगुलीओ मुहे छोढूण ★ पञ्चमी ---- क्षिप्तचित्तात् ॥
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |