________________
१०]
[ऋषिदत्ताचरित्रसंग्रहः ॥ सुयणो सरलसहावो दक्खिण्णमहोयही गुणविसालो । नाइपडिवण्णपरो गुरुयणपूयारओ तह य ॥८४।। किं बहुणा भणिएणं जे केइ गुणा तिलोयमज्झम्मि । ते सव्वे वि य लीणा, तम्मि कुमारे सयं चेव ॥८५।। एवं वच्चइ कालो हेमरहो भुंजए वरं रज्जं । अह अत्थि दूरमग्गे तस्सेव वरस्स नगरस्स ॥८६।। कावेरीनामेणं नयरी धण-धण्णमंडियऽभिरामा । उज्जाण-वावि-दीहिय-देवउल-तलायसंवुत्ता ॥८७॥ धवलहर-आवणेहि य चउक्क-तिय-चच्चरेहिं सा कलिया । अहवा किं बहुएणं, धणयपुरीए समा सा वि ॥८८।। निच्चं पमुइयहिट्ठो, वजरिमाईहिं कीलणसएहि । जत्थ जणो कीलंतो गयं पि कालं न याणेइ ॥८९॥ कीलंता य हसंता, भासंता तह य चंकमंता य । विलसंता दीसंता देवाण विहियवरा लोया ॥९०॥ इय एरिसजणजुत्ता, सा नयरी भुंजए मणऽभिरामा । राया अरिभयकारी, 'सुंदरपाणि' त्ति नामेणं ॥९१।। अरिहत्थीण मियारी, भाणू मो बंधुपंकयवणस्स । पणइकुमुयाण चंदो, पाउसकालो य लोयाणं ॥९२। देइ धणं अधणाणं पालइ सधणे पराए नीईए । बंधु विहूणाणं वि सो जणाणं बंधुत्तणं कुणइ ॥९३|| तस्स य सुंदरपाणिस्स, राइणो वल्लहा मणऽभिरामा । सुकुमालपाणि-पाया वासुल नामऽत्थि वरपत्ती ।।१४।। निम्मलकुलप्पसूया, असुइत्तविवज्जिया गुणनिहाणं । सा सुयणधम्मनिरया, दइया तह पुहइनाहस्स ॥९५।। वासुलदेवीधूया, रूववई अत्थि रुप्पिणी नाम । उत[त्त]त्तकणयवण्णा पढमवयत्था य सा तइया ॥९६।।
25
D:\amarata.pm5\3rd proof
