________________
[२९१
परिशिष्टम् [ २ ] ऋषिदत्ताख्यानकम् ॥]
नियभुयविढत्तधणवियरणेक्करसिया विसायरहियमणा । अहरीकयकप्पदुममाहप्पा सावया जत्थ ॥५॥ को वन्निऊण सक्कइ गुणनियरं तस्स पवरनयरस्स । सव्वं पि जत्थ दीसइ वसुमइअच्छेरयब्भूयं ॥६॥ तत्थ य समत्थि पत्थिवसमत्थजयलच्छिलालसेक्कमणो । निस्सेसगुणावसहो वसुंधराभारधरणसहो ॥७॥ जस्स गुरुविक्कमऽक्कंतवइरिणो विक्कमारुणनहेसु । संकंता पउरत्तं पावन्ति नमंतसामंता ॥८॥ हेमरहो नरनाहो समुद्दपज्जंतमेइणिसणाहो । रिउवंसजणियदाहो सव्वत्थवियंभियसलाहो ॥९॥ तस्सऽत्थि रूवलावन्नअमयकुल्ला विसालवरनयणा । वित्थरियमहीसुजसा सुजसा नाम महादेवी ॥१०॥ केलिगिहं सयलकलाकलावकुलबालियाए वररूवो । तेसिं समत्थि पुत्तो कणयरहो कणयसमवन्नो ॥११॥ विसयसुहमणुहवंतो तिवग्गसारं समं पिययमाए । पालंतो नियरज्जं गमेइ कालं महीवालो ॥१२॥ एत्तो कावेरिपुरी कावेरितरंगिणीजणियसोहा । अंबरलिहपासाया धण-धन्नसमिद्धजणकलिया ॥१३॥ विप्फुरियपउमरायाणि सोत्तिया-संख-विदुमजुयाणि । जत्थ जणस्स कुलाई तुल्लाइं नईए कूलेहिं ॥१४॥ तत्थऽत्थि नरवरिंदो सुंदरपाणी जहत्थकयनामो । निस्सेसनमिरनिवमउडरयणकिरणच्छुरियचरणो ॥१५॥ वासुलदेवी नामेण पणइणी तस्स अत्थि नरवइणो । निम्मलसीलाहरणालंकियदेहा सुहनिहाणं ॥१६॥ तीए समत्थि बाला मुहपरिमलहसियकमलवरमाला । सुसिणिद्धकसिणबाला नवरंभागब्भसुकुमाला ॥१७॥ कंकेल्लिपल्लवारुणकर-चरणा छणमियंकवरवयणा । लावन्नतिपरिपुन्नरूविणी रुप्पिणी नाम ॥१८॥ सा जोव्वणमणुपत्ता सव्वालंकारभूसियसरीरा । पिउपायपणमणत्थं जणणीए पेसिया बाला ॥१९॥ दुट्ठण तयं तारुन्नसरललायन्नसुंदरसरीरं। चिंतइ अणुरूवो को इमीए होही गुणेहिं वरो ? ॥२०॥ अणुरूववराभावे संबंधो वि हु न सोहमावहइ । ता किं सयंवरं सुत्तिऊण दूएहिं रायसुए ॥२१॥
D:\chandan/new/datta-p/pm5\2nd proof
