________________
[९१
रिसिदत्ताचरिए चउत्थं पव्वं ॥]
पुव्वाईण दिसाण, परिमाणं कुणइ भावसंजुत्तो । सीलेण भावियमणो, सो मणुयत्तं लहइ सहलं ॥२३१॥ उवभोग-परिभोगे, जिणमयदिट्ठीए परिमिए कुणइ । चरणजुत्तो जीवो, माणुस्सं तस्स इह सहलं ॥२३२॥ सामाइयसंजुत्तो वंदइ जो चेइए भउव्विग्गो । जिणवरधम्मे कुसलो, तस्स भवं चेव सकयत्थं ॥२३३॥ नवकारेण विबोहो, दिणे दिणे कुणइ गमणपरिमाणं । सावज्जे य विरत्तो मणुयभवं तस्स सुपसत्थं ॥२३४॥ अट्ठमिमाइदिणेसुं, चउभेयं कुणइ पोसहं धीरो । दयसंपण्णो जीवो, तस्स हु जम्मो हवइ सफलो ॥२३५॥ तव-नियमसंजुयाणं, गुत्ताणं बंभचेरजुत्ताणं । नायगयं देइ धणं, सहलं मणुयत्तणं तस्स ॥२३६॥ इय एवमाइधम्मं काऊणं अंतकालसमयम्मि । संलेहणकयपुव्वो पच्चक्खाणं कुणइ धीरो ॥२३७॥ पच्चक्खियआहारो, आलोयण-नियम-भावणाजुत्तो । आउक्खयम्मि धीरो, सुरलोयं चेव सो जाइ ॥२३८॥ तत्थ वि सोहम्माईसु, अंतमुहुत्तेण सो हु उववज्जे । सयणीए य महल्ले अह निद्दखए व उठेइ ॥२३९॥ जय नंदा जय भद्दा, अम्हाणं सामिओ तुम देव ! । अम्हे किंकरदेवा, एवं पथुणंति ते तुट्ठा ॥२४०॥ एयं तुम्ह विमाणं, एसो तुह संतिओ जुवइसंघो। तं चेव इंदसमो, इंदो वा एत्थ उववन्नो ॥२४१॥ एए सुरतरु-वावी-रयणाई देवसंतियाई ति । एए वि देवसंघा, तुज्झं आणं पडिच्छंति ॥२४२॥ अह सो वि जायसंको, अवहिं उवजुंजिऊण जोएइ। किं एयं मम संतियं ? किं वा अण्णस्स कस्साऽवि ? ॥२४३॥
20
25
D:\amarata.pm5\3rd proof
