________________
रिसिदत्ताचरिए
दुइज्जं पव्वं ॥ [स्नेहरागः]
अह सा रिसिणा बाला मज्जिय-मंडिय-पसाहिया काउं । जणणीए संतियं सा गहाविया सयलमाभरणं ॥१॥ मणिरयणकंचणेहिं काउं आभरणभूसियं बालं । रिसिणा तं उवणीयं पुरओ कुमरस्स तं कण्णं ॥२॥ दट्ठण तं कुमारो, देवाण वि दुल्लहं वरं बालं । हरिसभरनिब्भरंगो एवं चिंतेउमाढत्तो ॥३॥ सो धण्णो जो ईए पवराए बालाए घोट्टई अहरं । परिणयबिंबसरिच्छं आसायइ पंकयच्छीए ॥४॥ धण्णो होही पुरिसो, इमीएँ वच्छत्थलम्मि सुविसाले । उण्णयथणे घणकलसे पीडइ जो निययअंगेणं ॥५॥ एईए वरनियंबे, धण्णो जो रमइ रइसुहं पुरिसो । कह पावेउ अहण्णो, उरुजुयलं कोमलं ईए ॥६॥ इय पुण्णिमिंदवयणा धवलच्छी कमलकोमलसरीरा । जो अवरुडइ एसा, सहलो सो जीवलोगम्मि ॥७।। ता जइ एयं बालं, देइ विही कह व मज्झ परितुट्ठो । तो नो अण्णं नारिं परिणेमि अह सुरूवं पि ॥८॥ एसा य वरा बाला, उवणीया मज्झ रिसिवरेण इहं । केणेव कज्जेण पुणो न याणिमो किं पि परमऽत्थं ॥९॥ ता किं मग्गेमि अहं, एयं वरबालियं कुवलयऽच्छि । किं वा सयं व देही, एसा मह रिसिवरो तुट्ठो ॥१०॥
D:\amarata.pm53rd proof
