________________
થોડા વર્ષો પૂર્વે કોઈ ભાઈએ પોતાના પ્રકાંડ વિદ્વાન જોષીને મિત્રની કુંડલિ બતાવી. તે જોઈને જોષીએ કહ્યું, “તમારા તે મિત્ર હાલ કોઈ ભયંકર આપત્તિમાં છે. કદાચ આજે રાતે આપઘાત પણ કરી નાંખશે. તમે જલદી તેમને બચાવો.”
ભાઈએ કહ્યું, “મારો તે મિત્ર ખૂબ સુખી છે અને ખૂબ આનંદમાં છે. તમારું કથન સાવ મિથ્યા છે. તમે ફરીથી બરોબર કુંડલિ જુઓ.”
ફરીથી ગ્રહો જોયા બાદ પણ જોષીએ તે જ વાત ફરીથી કરી. છેવટે નિર્ણય કરવા માટે બંને ભાઈઓ તે મિત્રને ઘરે ગયા.
ખરેખર મિત્ર ખૂબ આનંદમાં હતો. જોષીએ આશ્ચર્યમુગ્ધ થઈને તે ભાઈને પૂછ્યું, “બહારથી જ આનંદમાં છો કે ભીતરમાં પણ ?”
મિત્રે કહ્યું, “ભીતરમાં પણ.”
આશ્ચર્યથી મૂઢ થયેલા જોષીએ મિત્રને બધી વાત વિગતથી પૂછી. મિત્રે કહ્યું, “આજથી છ માસ પૂર્વે તમે કહો છો તેવી ભયાનક પરિસ્થિતિનો હું ભોગ બન્યો હતો. એક દિવસ આપઘાત કરવાનો મેં નિર્ણય કર્યો. છેલ્લી પ્રભુભક્તિ કરવા માટે હું અમારા દેરાસરમાં બપોરે બાર વાગે ગયો. કોણ જાણે, તે દિવસે હું ભક્તિમાં એટલો બધો તન્મય થઈ ગયો કે સાંજના પાંચ વાગી ગયા તો ય મને ખબર ન પડી.
એ પછી ઘેર આવ્યો અને એકાએક ચારેબાજુથી પરિસ્થિતિ સાનુકૂળ થવા લાગી ગઈ. મારો ભાગ્યનો સિતારો ચમકી ગયો. પછી તો હું લાખો રૂપિયા કમાયો.”
આ સાંભળીને જોષીએ નક્કી કર્યું કે તન્મય થઈને કરાતી ભક્તિમાં કર્મોને મારી હઠાવવાની અમોઘ શક્તિ પડેલી છે.
કૃત્યા રાક્ષસીનો પ્રસંગ આપણને ખૂબ ખૂબ ધર્મબળ આપી જનારો બનો.
ધર્મ તો મારો સ્વભાવ છે
જૈન મહાભારત ભાગ-૨
