________________
श्रियाऽम्बुसङ्घट्टनिवासखिन्नया विनिश्चिताऽऽनन्दधियाऽत्र संस्थितिः । नदीपथेनाऽऽगतया तया गृहे गृहे पदन्यासकृताऽतिनर्तितम् ॥४३॥
सुखेन सख्येन च सज्जसृष्टिना बलेन बोधेन च बद्धबुद्धिना । धुता च दानेन च दिव्यदर्शिना पुरेण देवस्थलमस्ति निर्जितम् ॥४४॥
भवन्ति युध्येव जनस्य मार्गणा महात्मनामेव पुरेऽत्र भिक्षितम् । किलाऽन्त्यकाले निधनत्वलक्षणा निरङ्कशास्सन्ति यतोऽत्र सम्पदः ॥४५॥
अघेषु दोषेषु भवन्ति भीतयो धनेषु वा व्यापरणेषु नीतयः । वचस्सु चैवं रचनासु रीतयस्ततो हि मिष्टा वनितासु गीतयः ॥४६॥
परस्य दुःखानि विलोक्य यज्जनस्ततोऽधिकं दुःखमनन्तमाश्रयेद् । इदं विचार्यैव विधिर्दयावशात्पुराद्धि दुःखानि निराकरोदितः ॥४७॥
न दोषवन्तो मधुरा प्रसादिताः सदौजसोऽनेकरसा अलङ्कृताः । सदा सदौचित्यमया ध्वनीहिता वसन्ति सन्तोऽत्र हि काव्यसन्निभाः ॥४८।।
श्रीमाणिभद्रमहाकाव्यम् १
