________________
૯૩
ધર્મઝનૂન શું કરે છે ?
એ જ પ્રસંગે વિચરતા વિચરતા ખંભાતમાં પહોંચેલા શ્રીમાન લવજીઋષિ ધર્મપ્રચાર કરી રહ્યા હતા. તેમનાં તપશ્ચરણ અને ત્યાગને લઈને જનતા તે તરફ ઢળવા લાગી. અને તેમના તાત્ત્વિક સિદ્ધાંતો તેમને રુચવા લાગ્યા. આ વાતની યતિઓને ખબર પડવાથી તેમને એટલું તો લાગી આવ્યું કે, ‘આનું હવે કાસળજ કાઢી નાખવું જોઈએ.’
‘પ્રિય પાઠક ગણ ! અધિકારવાદને ટકાવવા માટે મનુષ્ય કેવા કેવા અનર્થ કરી બેસે છે તેનો તો આ લેખમાળામાં પણ ઘણા પ્રસંગથી તમોને ખ્યાલ આવી ગયો હશે. આ લોકૈષણાનું સંવેદન એટલું બધું તીવ્ર હોય છે કે તેવા પ્રસંગે પોતાના સ્થાનની જવાબદારી મનુષ્ય છેકજ ભૂલી જાય છે. આશ્ચર્યની વાત તો એ છે કે આ બધો અનર્થ પાછો શાસનની પ્રભાવનાને નામે ચડાવાય છે. કેટલો શાસનદ્રોહ ! પોતાની તીવ્ર કાબાયિક પ્રવૃત્તિને પોષવા માટે આવો પ્રચાર કરવો તે કેવું ભયંકર પાપ ! ખરેખર ધર્મને નામે આવી ઝઘડાખોર પ્રવૃત્તિ અતિ અસહ્ય છે. આ સડાનો તો તીવ્ર નાશજ થવો જોઈએ. પરંતુ જો શ્રાવકોમાં વિવેકચક્ષુ જાગ્રત થયાં હોત તો એ સડો વધત જ શી રીતે !
એ યતિઓએ પોતાની આ દુષ્ટ ભાવના પૂર્ણ કરવા માટે ખુદ વીરજી વોરાને (કે જે સંસારપક્ષે તેમના નાના થતા હતા તેને) ઉશ્કેર્યા. તેણે પોતાની લાગવગનો દુરુપયોગ કરી ખંભાતના નવાબને એક લાંબો પત્ર લખ્યો. અને તેમાં ઘણું જૂઠાણું લખી કાઢ્યું.
તિતિક્ષાની પરાકાષ્ઠા
નવાબના માણસોએ લવજીઋષિને ડેલા પાસે બેસાડી રાખ્યા અને ફરતો ચોકી પહેરો રાખી દીધો. શ્રીમાન લવજીઋષિએ એક શબ્દ સરખો ઉચ્ચાર્યો નિહ. ઊલટું સહજ તપશ્ચરણ માની સ્થિર આસન કરી ધ્યાનમાં આરૂઢ થયા. એક જૈન મુનિના આવા દૃઢ આત્મબળથી પહેરો ભરતા ચોકીદારો પર ઘણી સારી અસર થઈ. અને તે સમાચાર ખાનગી રીતે બેગમને મળતાં તેણે નવાબને સમજાવીને મુનિશ્રીને માનસહિત મુક્ત કર્યા.
આ બનાવ બન્યા પછી તો લવજીઋષિની કીર્તિ ચારે કોર ફેલાવા લાગી, અને ઘણા શ્રાવકો યતિઓનાં ફાંસામાંથી છૂટીને તેના દૃઢ ભક્ત થઈ ગયા. ધર્મપ્રાણ : લોંકાશાહ
