________________
આવતાંની સાથે જ તેઓએ કોલેરા વોર્ડની મુલાકાતો શરૂ કરેલી અને ગામનું અવલોકન બારીકાઈથી કરેલું. પ્રથમ નજરે જ તેમને લાગ્યું કે ગામની ગંદકી દૂર કરવી જ જોઈએ.
વિરમગામની તવારીખમાં ગ્રામસફાઈ સમિતિ એક વિરલ યાદગીરી ગણાશે. એની શરૂઆતનો દિવસ, ધન્ય દિવસ ગણાશે. તેમની પ્રેરણા અને પ્રયત્નોથી શરૂ થયેલી સમિતિનું કાર્ય એટલું તો વ્યાપક બન્યું કે અમને તો ચમત્કાર જેવું જ લાગે છે. જો કે આ ચમત્કાર નથી જ. મહામહેનતનું પરિણામ માત્ર જ છે. પણ અમે કોલેરામાંથી બચ્યા અને મેલેરિયા પણ અટકયો. આમાં કશી જ અતિશયોક્તિ નથી.
તેમની વાણીમાં તેમની સત્યનિષ્ઠા, તપ અને સતત પુરુષાર્થને લીધે જ ચૈતન્ય શક્તિ અને પ્રેરણા પૂરવાની તાકાત છે તેનું જ આ પરિણામ છે.
સંતપુરુષ અને તેમાંયે જૈન સાધુને યશ કે અપયશનો પ્રશ્ન હોય જ નહિ. તેમાંયે પોતે તો માને છે, કે અમારી ફરજ અમે ચૂકયા છીએ. તે પાપના પ્રાયશ્ચિત અર્થે પણ હવે અમારે મોડું કર્યું પાલવે એમ નથી.
યુગપ્રવર્તક પુરુષ
એમણે જે કામ અહીં અને ભાલ નળકાંઠા અને બીજે કર્યું છે તે વિષે ઘણા જાણે છે. આ બધી પ્રવૃત્તિઓનું અદ્ભુત પરિણામ થોડા જ વર્ષોમાં ભાલ નળકાંઠામાં આપણે જોઈ શકીશું. તેઓ વિચારશીલ, જ્ઞાનશીલ, કર્તવ્યશીલ, અને ધર્મશીલ પુરુષ છે. ગુજરાતની પ્રજામાં તેજસ્વી પુરુષ છે. જનસેવા તે પ્રભુસેવા છે એમ પ્રત્યક્ષ આચરણથી સિદ્ધ કરે છે. આવો પુરુષ થોડા જ સમયમાં સાધુ સમાજમાં યુગપ્રવર્તક સાધુ બનશે, એવી અમારી ધારણા છે. ધીમે ધીમે તેઓ તેમનું મહાન જવાબદારી ભર્યું સ્થાન દિપાવશે.
વિરમગામ તીર્થધામ
ગંદકીનું ધામ ગણાતું વિરમગામ આજે તો તેમના પ્રયત્નોને લીધે તીર્થધામ બન્યું છે. એ ઉપકાર અમે ભૂલી શક્તા નથી. અમે તેમને પુનઃ વિનવીએ છીએ કે તેઓશ્રી અમને વિસારે નહિ.
આવા પુરુષને જગત ઓળખે અને ધર્મ, સમાજ તથા રાજકીય ક્ષેત્રમાં ક્રાન્તિ કરાવે, તેવી વિનંતી કરીએ છીએ. આ માત્ર લાગણીભર્યા શબ્દો નથી પણ પ્રત્યક્ષ અનુભવનો સાર છે.
(સમારંભના યોજક તરીકે તાલુકા સમિતિના મંત્રી શ્રી છોટાલાલ છગનલાલ ભટ્ટનું ભાષણ) વિરમગામમાં ચાતુર્માસ
