________________
રાજકોટમાં કાર્યકર્તા તાલીમ વર્ગ
(૧૯-૯-૪૮ થી ૨૩-૧૦-૪૮) મુનિશ્રી પોતાના ચાતુર્માસ દરમિયાન કાર્યકર્તાઓને તાલીમ આપવા માટે વિશ્વ વત્સલ ચિંતક વર્ગ ૧૯૪પથી ચલાવતા આવ્યા છે. વર્ષમાં બે અથવા ત્રણ અનુકૂળતા પ્રમાણે, સ્થળ અને સમયની મર્યાદા પ્રમાણે આવા વર્ગ ૧૦ થી ૧૫ દિવસના ચલાવતા. પરંતુ ચાતુર્માસમાં તેમને સ્થિરવાસ હોઈ વધુ સમય આપી શકતા.
રાજકોટ ચાતુર્માસ દરમિયાન આવો તાલીમવર્ગ ૧૯-૯-૪૮થી ૨૩-૧૦-૪૮ સુધી ૩૫ દિવસ માટે રાખવામાં આવ્યો હતો. આ અંગે જેને આ વર્ગમાં જોડાવું હોય તેની લાયકાત વગેરે અંગે ૧૬-૯-૪૮ના વિ.વા.માં જાહેરાત આપવામાં આવી હતી. અને વર્ગમાં શું શું ચર્ચવામાં આવશે, વગેરેની આછી રૂપરેખા પણ આપવામાં આવી હતી.
આ અંગે એક ભાઈએ લખેલ પત્ર અને તેના અનુસંધાનમાં મુનિશ્રીનો જવાબ બંને વાંચતાં, મુનિશ્રીના મનમાં આ વર્ગનું મહત્ત્વ કેવું છે તેનો ખ્યાલ આવી રહેશે.
'વિશ્વવાત્સલ્ય ચિંતક વર્ગ” પાંત્રીસ દિવસ માટે આપ તા. ૧૯-૯-૪૮થી શરૂ કરવાના છો, તે જાણી મને ખૂબ આનંદ થયો છે. એ રીતે આપણા સમાજમાં અમુક વિચારસરણી દ્વારા જીવન ઘડતર કરવાની દષ્ટિ ખીલવી શકાશે; એટલું જ નહીં પરંતુ આજે અર્થને પ્રાધાન્ય આપીને જીવન વહેણમાં ઘસડાનાર સમાજના મોટા વર્ગના માનવજીવનનું સાચું રહસ્ય સુઝાડનાર-ધર્મ તરફ અભિમુખ કરે એવો ચિંતક વર્ગ ક્રમશઃ તૈયાર કરી શકાશે.”
વર્ગ શરૂ થઈ ચૂક્યો છે. ધારવા કરતાં સૌરાષ્ટ્રના કાર્યકરોની સંખ્યા ઘણી જ ઓછી છે. ગુજરાતની વધારે છે. સફાઈ, પિસાઈ, રસોઈથી માંડીને શકય તેટલા સ્વાશ્રયી વર્ગો ચાલે છે. શારીરિક શ્રમ, વ્યાયામ, બૌદ્ધિક, ભાવનાત્મક, હિંદુસ્તાની, કતાઈ વગેરે બાબતો એમાં છે. કાર્યકરો પોતાના એ સેવાકાર્યમાં ઈશ્વરી તત્ત્વની ઝાંખી કરે, ધર્મદષ્ટિએ પોતાના અંગત અને સામાજિક જીવનને જોવા લાગે એ આવા વર્ગો પાછળનું મધ્યબિંદુ છે. વ્યાપારી અને બીજાં ભાઈબહેનો પણ આમાં રસ લઈ શકે એવી જોગવાઈ – થોડી છૂટછાટ સાથે કરવામાં વર્ગ સભ્યોએ સર્વ સંમતિથી ફાળો આપ્યો છે... સૌરાષ્ટ્રની વિહારયાત્રા
૧૫૧
