Page Text
________________
કરવાં જ જોઈએ. મહારાજશ્રીએ તેમને સમજાવ્યાં કે રોજ પ્રવચનો તો ચાલુ જ છે. ઓછું કહેવાયું નથી. વળી એ ભાઈઓને પણ ઠીક લાગશે. પણ આવેલાંનો આગ્રહ ચાલુ રહ્યો. તેમણે દલીલ કરી : આપનું સમગ્ર જીવન લોક હિતાર્થે છે તો સભા ભરી સર્વાનુમતે ઠરાવ કરો કે મહારાજશ્રીએ પર્યુષણમાં પ્રવચનો ચાલુ રાખવાં જ જોઈએ તો આપ સ્વીકારશો ને? મહારાજશ્રી પાસે આનો જવાબ ન હતો. મૂક સંમતિ મળી ગઈ. લોકોમાં આનંદનો પાર ન રહ્યો. પણ સભા ભરી સર્વાનુમતિથી ઠરાવ કરાવવાની જવાબદારી આવી પડી. એટલે સૌ કામે લાગી ગયાં. ચીમનલાલ નાગરદાસ એડ્વોકેટ, છોટાલાલ વકીલ, જયસુખભાઈ શાહ જેવા યુવાન આગેવાનો અને બીજા ભાઈબેનોના પ્રયત્નથી એક વિશાળ સભા ભરાઈ. તેમાં મુનિશ્રી પર્યુષણમાં પ્રવચનોનો લાભ આપે તેવો સર્વાનુમતિથી ઠરાવ પસાર થયો.
સંઘરાજકા હાઉસના વિશાળ કંપાઉન્ડમાં પર્યુષણ પર્વની તૈયારીઓ શરૂ થઈ. વીજળી કંપનીએ વીજળી પૂરી પાડી. મંડપ કોંટ્રાકટરે મંડપ બાંધી દીધો. લાઉડ સ્પીકર તો હતું જ. સ્વયંસેવકો તૈયાર થઈ ગયા. જે સાધનોની જરૂર પડી તે બધાં આવી મળ્યાં. સુંદર મંડપ તૈયાર થઈ ગયો.
પર્યુષણોમાં દાનો ઉધરાવાય છે. ભોજન સમારંભો યોજાય છે તેને બદલે બધું નવી જ ઢબથી ગોઠવાયું. હરિજન સંસ્થાઓને દાન આપ્યું. લહાણીમાં જ્ઞાનવર્ધક પુસ્તિકાઓ વહેંચાઈ.
સૌરાષ્ટ્રનું એકમ થયા પછી આખા રાજ્યના સફાઈ કામદારોનો પગાર કેટલો હોવો જોઈએ તેને માટે સૌરાષ્ટ્ર સરકારે એક કમિટી નીમી હતી. તેમાં સરકારે મહારાજશ્રી પાસે સલાહની માગણી કરી. સચિવાલયમાં કમિટી સમક્ષ પોતાના વિચારો રજૂ કર્યા. તેમણે જણાવ્યું કે સફાઈનું કામ એ શાળાના એક શિક્ષકથી જરાય ઊતરતું નથી એટલે ઓછામાં ઓછા માસિક સો રૂપિયા જેટલો પગાર તેમને મળવો જોઈએ. વળી સફાઈ કામ એક વર્ગની મોનોપોલી ન બનવું જોઈએ. આ બે ક્રાંતિકારી વિચારોએ સૌને આશ્ચર્ય ચકિત કરી દીધેલા. નાણાં પ્રધાન જગુભાઈ પરીખ અને પરીક્ષિતભાઈ સંમત થયા. પણ સરકારના આંકડાશાસ્ત્રીઓએ વિરોધ કર્યો. તેમ છતાં જે વેતન મળતું હતું તેમાં સારો એવો વધારો કરવામાં આવ્યો.
આમ રાજકોટનું ચાતુર્માસ અનેકવિધ પ્રવૃત્તિઓથી ધમધમતું અને છતાં નવાં મૂલ્યોની સ્થાપનાની દષ્ટિએ યાદગાર બની ગયું.
સાધુતાની પગદંડી
૧પ૦
| SR No. | 008077 |
| Book Title | Sadhuta ni Pagdandi Part 2 |
| Original Sutra Author | N/A |
| Author | Manilal Patel |
| Publisher | Mahavir Sahitya Prakashan Mandir Ahmedabad |
| Publication Year | 1994 |
| Total Pages | 217 |
| Language | Gujarati |
| Classification | Book_Gujarati & Religion |
| File Size | 14 MB |