________________
विसेसचुण्णि
[मासकप्पपगयं तित्थाणुसज्जणाए, आयहियाए परं समुद्धरति । मग्गप्पभावणाए, जइधम्मकहा अओ पढमं ॥११४२॥
“तित्थाणु०" गाहा । तित्थं अणुसज्जावियं भवति । पव्वावितण तित्थं अणुसज्जावितेणं आयहितं कयं भवति परहियं चशब्दात् । आयपरहिएणं सत्ताणं परं च उद्धरति संसाराओ। किं निमित्तं? जम्हा सन्मार्गप्रभावनं करोति । जम्हा एते गुणा वा दोसा वा विहि अविहिकहणे तम्हा जइधम्मकधा पढमं कहेयव्वा । जया तं न गिण्हइ तया अणुधम्मो कहेयव्वो। जया तं पि न पडिवज्जइ तया सम्मत्तं । जया समत्तं पि न पडिभासइ तया मज्ज-मंसविरई वि । एयं अणुवासयस्स एवं कहिज्जइ । सावयस्स पुणं जहा पडिभाइ तह कहेउ कहओ। पव्वज्ज त्ति गयं ।
इयाणि सिक्खापदं ति दारं । तत्थ -
पव्वइयस्स य सिक्खा, गयण्हाय सिलीपती य दिटुंतो । तइयं च आउरम्मी, चउत्थगं अंधले थेरे ॥११४३॥
"पव्वइयस्स०" गाहा । पव्वइयस्स समाणस्स सिक्खा भवति । सा दुविहा सिक्खा - गहणसिक्खा य आसेवणसिक्खा य । गहणसिक्खा सुत्तत्थतदुभयाणि । आसेवणसिक्खा पडिलेहणाई । सो पव्वइओ समाणो आयरिएहिं भन्नइ - एयं दुविहं सिक्खं गेण्हाहि । ताहे सो आसेवणसिक्खं इच्छइ, गहणसेक्खं नेच्छइ । इमं उत्तरं देइ -
पव्वइओऽहं समणो, निक्खित्तपरिग्गहो निरारंभो। इति दिक्खियमेकमणो, धम्मधुराए दढो होमि ॥११४४॥ समितीसु भावणासु य, गुत्तीपडिलेहविणयमाईसु। लोगविरुद्धेसु य बहुविहेसु लोगुत्तरेसुं च ॥११४५॥ जुत्त विरयस्स सययं, संजमजोगेसु उज्जयमइस्स । किं मझं पढिएणं ? भण्णइ सुण ता इमे नाए ॥११४६॥
"पव्वइओऽहं समणो०" ["समितीसु०" "जुत्त०"] गाहाओ तिन्नि उच्चारियसिद्धाओ। किं मम पाढेणं? आयरिओ भणइ-जयत्थं तुमं पव्वइओ सो चेव ते अत्थो न भविस्सइ ।
१. अत्ताणं इति भाव्यम् ? ।
