________________
विसेसचुण्णि
[मासकप्पपगयं "पव्वज्जा सिक्खापय०" एस दारगाहा । पढमं दारं पव्वज्ज त्ति । सोच्चाऽभिसमेच्चा वा, पव्वज्जा अभिसमागमो तत्थ । जाइस्सरणाईओ, सनिमित्तमनिमित्तओ वा वि ॥११३३॥
["सोच्चाभिसमेच्चा०"] कहं चेव सो पव्वइओ? उच्यते-सोच्चा व अभिसमेच्चा वा। तत्थ अल्पस्वरतरमिति काउं अभिसमागमं ताव पढम भण्णति । सो सनिमित्तओ वा अनिमित्तओ वा भवति । सनिमित्तओ जहा बंभदत्तेणं जाई सरिया। चित्तेण य सुकोसलेण य। अनिमित्तिओ जस्स एवं चेव जाईसरणं भवति । आइग्गहणेणं ओहिन्नाणेणं मणपज्जवविब्भंगाइ । अभिसमिच्च त्ति गयं । इदाणिं सुणित्ता । किं सोच्चा ? उच्यते -
सोच्चा उ होइ धम्मं, स केरिसो केण वा कहेयव्वो ? । के तस्स गुणा वुत्ता ?, दोसा अणुवायकहणाए ॥११३४॥
"सोच्चा तु होई धम्म०" गाहा । धम्मं सोउं पव्वएज्जा । सो धम्मो केरिसो? उच्यते -
संसारदुक्खमहणो, विबोहओ भवियपुंडरीयाणं । धम्मो जिणपन्नत्तो, पगप्पजइणा कहेयव्वो ॥११३५॥
"संसारदुक्खमहणो, विबोहओ भवियपुंडरियाणं ।” सो य जिणेहिं पण्णत्तिल्लओ। संसारे दुक्खं संसारदुक्खं । सो पुण केरिसेणं पुरिसेणं कहेयव्वो? उच्यते-पकप्पजइणा कहेयव्वो। पकप्पजइ नाम निसीहधारओ संविग्गो । आह–किं कारणं अभविए न बोहेइ? उच्यते -
जह सूरस्स पभावं, दटुं वरकमलपोंडरीयाई।
बुज्झंति उदयकाले, तत्थ उ कुमुदा न बुझंति ॥११३६॥ "जह सूरस्स पभावं०" गाहा । कण्ठ्या । एवं भवसिद्धीया, जिणवरसूरस्सुतिप्पभावेणं । बुज्झंति भवियकमला, अभवियकुमुदा न बुज्झंति ॥११३७॥
"एवं भवसिद्धीया०" गाहा । कण्ठ्या । सो य धम्मो उवाएण कहेयव्वो, न अणुवाएण। आह-के तस्स गुणा वुत्ता उवायकहणे, दोसा वा अणुवायकहणे? उच्यते -
