________________
२०० विसेसचुण्णि
[मासकप्पपगयं “एगत्थ०" गाहा । एक्कीए पडिग्गहे सीयं, बिइआए पडिसेहे उण्हं, तइयाए पाणयं - अह दोन्नि एक्काए उसिणं एक्काए पाणगं दोसीणं उप्पाडियं कत्थ गेण्हंतु ? सीउण्हाणं च समवायो विरुद्धो पूर्वोक्त एव । जइ न गेण्हंति चिरं अडियव्वं भवति । चिरं च अडणं न वट्टइ निग्गंथीणं । एएण कारणेणं तिप्पभिई हिंडंति । किं चान्यत् -
थी पुरिसो अ नपुंसो, वेदो तस्स उ इमे पगारा उ। फुफुमदवग्गिसरिसो, पुरदाहसमो भवे तइओ ॥२०९८॥ जह फुफुमा हसहसेइ घट्टिया एवमेव थीवेदो । दिप्पइ अवि किढियाण वि, आलिंगणछंदणाईहिं ॥२०९९॥ न वओ इत्थ पमाणं, न तवस्सित्तं सुयं न परियाओ । अवि खीणम्मि वि वेदे, थीलिंगं सव्वहा रक्खं ॥२१००॥ कामं तवस्सिणीओ, पहाणुव्वट्टणविकारविरयाओ। तह वि य सुपाउआणं, अपेसणाणं चिमं होइ ॥२१०१॥ रूवं वन्नो सुकुमारया य निद्धच्छवी य अंगाणं । होंति किर सन्निरोहे, अज्जाण तवं चरंतीणं ॥२१०२॥
"थी पुरिसो अ०" ["जह फुफुमा०" "न वओ०" "कामं०" "रूवं वन्नो०"] गाहाओ। पंच कण्ठ्याओ। भिक्खनिग्गमे त्ति गयं ।
इदाणिं निग्गंथाणं मासो, निग्गंथीणं दुवे मासा । कम्हा तासिं दुवे मासा ? चोयगो चोएइ-किं निग्गंथीणं बहुतराणि महव्वयाणि जेणं निग्गंथाणं मासो, निग्गंथीणं दुवे मासा ? आयरिओ भणइ -
जति वि य महव्वयाइं, निग्गंथीणं न होति अहियाई। तह वि य निच्चविहारे, हवंति दोसा इमे तासिं ॥२१०३॥ मसाइपेसिसरिसी, वसही खेत्तं च दुल्लभं जोग्गं । एएण कारणेणं, दो दो मासा अवरिसासु ॥२१०४॥ दोण्हं उवरि वसंती, पायच्छित्तं च होंति दोसा य । बिइयपयं च गिलाणे, वसही भिक्खं च जयणाए ॥२१०५॥ "जति वि य०" ["मंसाइ पेसिया०" "दोण्हं०"] गाहाओ तिण्णि कंठाओ ।
