________________
११० विसेसचुण्णि
[मासकप्पपगयं मत्तएसु जयंति । ओगासो जत्थ नाणुन्नायं अच्छण-भायण-धोयणाइ तत्थ कप्परमाईएसु धुवंति, तणफलए नाणुण्णाए वज्जेति । सारक्खणया नाम जत्थ भणंति गोणाईहिं भज्जमाणिं वसहिं सारक्खह । जं वा अन्नं वसहिसमीवे घरं तत्थ वि असिवाईहिं ठायमाणा भणंति-जइ पासिस्सामो तो रक्खिस्सामो । संठवणयाए भणंति-अम्हे अकुसला संठवियव्वे । पाहुडं नाम सपाहुडियाए सेज्जाए कारणे ठिया । देसे सव्वे वा कीरमाणीए उवगरणं सारक्खंति । जाव पाहुडिया कीरइ ताव एक्कपासे ठाएंति । दीवे अग्गिम्मि य कारणे ठिया आवस्सगाइ बाहिं करेंति । पोरिसिं पि बाहिमणेण वा । ओहाणे त्ति कारणे ठियाणं जइ भणंति गिहत्था छेत्ताईणं अट्ठाए बाहिं निगच्छमाणा-अम्ह वि घरेसु ओहाणं देज्जह, मा सुणओ वा अवरज्झिहि त्ति तेणेहिं ति वा कोइ तत्थ ओहणं देंति अणुवट्टावियमादीहिं । वसे कई जणा य त्ति । जत्थ तेहि परिमाणं कयं जहा एत्तिएहिं जणेहिं वसियव्वं तत्थ अन्नएसु आगएसु पुणरवि अणुण्णवणा। अणणुजाणतो अन्नवसहीए ठविज्जति ।
भिक्खायरिया पाणगलेवे पडिमा एगट्ठा वक्खाणेइ - निययाऽनियया भिक्खायरिया पाणऽन्न लेवऽलेवाडं।
अंबिलमणंबिलं वा, पडिमा सव्वा वि अविरुद्धा ॥१६३३॥
"निययाऽनियया०" गाहा । भिक्खायरिया अभिग्गहिया वि एक्किन्नेसणा वि भत्तपाणं लेवाडं पि अलेवाणं पि आयंबिलं करेंति वि न करेंति वि । पडिमाओ करेंति वि न करेंति वि । सामायारी गया ।
इदाणि ठिति त्ति दारं । खित्ते काल चरित्ते, तित्थे परियाय आगमे वेए। कप्पे लिंगे लेसा, झाणे गणणा अभिगहा य ॥१६३४॥ पव्वावण मुंडावण, मणसाऽऽवन्ने उ नत्थि पच्छित्तं ।
कारण पडिकम्मम्मि उ, भत्तं पंथो य भयणाए ॥१६३५॥
"खेत्ते कालचरित्ते०" ["पव्वावण'"] दारगाहाद्वयम् । खेत्ते काले एगट्ठा वक्खाणेइ -
पन्नरसकम्मभूमिसु, खेत्तऽद्धोसप्पिणीइ तिसु होज्जा। तिसु दोसु य उस्सप्पे, चउरो पलिभाग साहारणे ॥१६३६॥ "पन्नरस०" गाहा । खेत्ते जम्मणसंतिभावेणं पन्नरससु कम्मभूमीसु, साहारणे
