________________
विसेसचुण्णि
[मासकप्पपगयं "पडिलेहियं च खेत्तं०" गाहा । पडिलेहिए खेत्ते निसीहिया, थंडिल्लं पडिलेहियव्वं । चोयगो भणति-ठायंता चेव तुब्भे अमंगलं करेह । आयरियो आह-लोके दृष्टत्वात् न भवत्यमंगलम् । गामाईण तप्पढमयाए निवेसिज्जमाणाणं पढमं सीयाण वत्थं पेहिज्जई। सीयाणं नाम मसाणं, तस्मान्न भवति अमंगलम् । कतराए दिसाए पडिलेहेयव्वं? उच्यते -
दिस अवरदक्खिणा दक्खिणा य अवरा य दक्खिणापुव्वा ।
अवरुत्तरा य पुव्वा, उत्तर पुव्वुत्तरा चेव ॥१५०६॥
"दिसा अवरदक्खिणा०" गाहा । कण्ठ्या । नवरं एक्केक्काए दिसाए तिन्नि ठाणाई, आसन्ने मज्झे दूरे त्ति । एयासिं दिसाणं गुणदोसा -
पउरन्नपाण पढमा, बीयाए भत्तपाण न लहंति । तइयाइ उवहिमाई, चउत्थी सज्झाय न करिति ॥१५०७॥ पंचमियाएँ असंखड, छट्ठीएँ गणस्स भेयणं जाण । सत्तमिया गेलन्नं, मरणं पुण अट्ठमीए उ ॥१५०८॥
"पउरन्नपाण पढमा०" ["पंचमियाए असंखड०"] गाहाओ दो कण्ठाओ। अहवा एक्काए चेव गाहाए भण्णइ -
समाही य भत्तपाणे, उवगरणे तुमंतुमा य कलहो उ। भेदो गेलन्नं वा, चरिमा पुण कड्डए अन्नं ॥१५०९॥ "समाही य भत्तपाणे०" गाहा । कण्ठ्या । एक्केक्कम्मि उ ठाणे, चउरो मासा हवंतऽणुग्घाया।
आणाइणो य दोसा, विराहणा जा जहिं भणिया ॥१५१०॥
"एक्केक्कम्मि ठाणे०" गाहा । तत्थ पढमाए जइ दविज्जमाणीए जइ दक्खिणदिसं पडिलेहेति तो चउगुरुगा, आणाइ । विराहणा दुविहा - आयाए संजमे य । तत्थ आयाए भत्तपाणं अलभंता जं परिताविज्जंति, संजमे अलभंता जं अणेसणाइ पेहेंति तन्निप्फण्णं । पढमाए असति वाघाओ वा अडवि-जल-तेण-सावयाईहि ताहे दक्खिणा । ताए विज्जमाणीए जइ तइयं पडिलेहिंति तत्थ वि उवहिमाई दोसा विभासियव्वा । एवं जावटम्मि य त्ति ताव विभासियव्वा।
