________________
७८
विसेसचुण्णि
[मासकप्पपगयं भण्णइ-'गाउयवासं करेज्जासि, बाल-वुड्डा-तरुणसहिया पडिस्सयपाला भविस्संति' त्ति काउं पेसिज्जति । एएसिं असईए२ ताहे वेयावच्चकरो अन्नस्स ठवणकुलाइं दरिसावेऊण पेसिज्जइ । एयाए विहीए गंतव्वं । पउसे (?) विसज्जणा उवहि अप्पिणणा य खामणे परोप्परं, दोच्चं नापुच्छंति मासलहुं । अणुग्गाहेत्ता आपुच्छितव्वं विसज्जणा आवस्सियं काऊण निग्गच्छंति ।
तिन्नेव गच्छवासी, हवंतऽहालंदियाण दोन्नि जणा। गमणे चोदगपुच्छा, थंडिलपडिलेहाहालंदे ॥१४७२॥
"तिन्नेव गच्छवासी०" गाहा । जघण्णेण तिन्नि जणा गच्छवासी एगदिसिं वच्चंति । तेहिं समं गच्छपडिबद्धाणं अहालंदियाणं संघाडओ वच्चइ । अवसेसासु दिसासु आयरियो वावारेइ 'एएसिं खेत्त पडिलेहेज्जह' त्ति ।
इदाणिं गमण त्ति दारं । पंथुच्चारे उदए, ठाणे भिक्खंतरा य वसहीओ।
तेणा सावय वाला, पच्चावाया य जाणविही ॥१४७३॥ "पंथुच्चारे०" गाहा । पंथं दव्वाइचउविहाए पडिलेहणाए पडिलेहेंति । वावारिय सच्छंदाण वा वि तेसिं इमो विही गमणे।
दव्वे खेत्ते काले, भावे पंथं तु पडिलेहे ॥१४७४॥
"वावारिय सच्छंदाण वा वि०" गाहा । दव्वओ कंटगवावारिया नाम जे आयरिएण निउत्ता, जहा - अमुगो अमुगो य वच्चउ । सच्छंदा नाम जे आभिग्गहिया। तेसिं दुएण्ह वि इमो गमणे विधी -
कंटग तेणा वाला, पडिणीया सावया य दव्वम्मि ।
सम विसम उदय थंडिल, भिक्खायरियंतरा खेत्ते ॥१४७५॥
"कंटग तेणा वाला०" अद्धगाहा । जो कंटगबहुलो तेण-वाल-पडिणीय-सावया य जम्मि पंथे तं उवधारेंति । खेत्तओ-“सम विसम०" पच्छद्धं गाहा । समो समपद्धरो पंथो, विसमो गिरिकंदर-पवाय-निन्नुनयबहुलो उदगबहुलो वा । थंडिलाणि य उच्चार-पासवणायरणा य, विस्समणठाणाणि य उब्भामयभिक्खायरियाओ गच्छस्स वच्चंतस्स अंतरवसहीओ वा सुलभाओ दुल्लभाओ वा तं उवधारेंति । कालओ -
१. मा उववासं करेज्जासि इति पाठः सम्यगवभासते । २. बप्रतौ पाठो निष्कासितो दृश्यते । ३. तम्मि उवधारेंति अ ।
