________________
भासगाहा-१२०४-१२१३] पढमो उद्देसो
वित्ती उ सुवन्नस्सा, बारस अद्धं च सयसहस्साइं। तावइयं चिय कोडी, पीईदाणं तु चक्कीणं ॥१२०७॥ एतं चेव पमाणं, नवरं रययं तु केसवा दिति । मंडलियाण सहस्सा, वित्ती पीई सयसहस्सा ॥१२०८॥ भत्तिविभवाणुरूवं, अन्ने वि य दिति इब्भमाईया। सोऊण जिणागमणं, निउत्तमनिओइएसुं वा ॥१२०९॥
["वित्ती उ०" "एवं चेव०"] "भत्तिविभवाणु०" गाहा । चक्कवट्टी वित्तिं देति णिउत्तस्स । अड्डतेरस-सुवण्णसयसहस्साइं । पीतिदाणं तु अड्डतेरस सुवण्णकोडीओ । केसवा एतप्पमाणमेव रुप्पं देंति । मंडलिया अड्डतेरस रुप्पसहस्सा वित्ती देंति, पीतिदाणं तु पुण अड्ढतेरस रुप्पसयसहस्सा देंति । के पुण गुणा दाणे ? उच्यते -
देवाणुवित्ति भत्ती, पूया थिरकरण सत्तअणुकंपा। साओदय दाणगुणा, पभावणा चेव तित्थस्स ॥१२१०॥
"देवाणुयत्ती०" गाहा । तीर्थकरभक्त्यां क्रियमाणायां देवाणुवर्तिता भवंति । कहं ? जो तित्थगराणं भत्तिं करेइ स देवानां प्रियो भवति । भक्तिश्चैवं कृता भवति । तीर्थकरपूजा चैवं थिरीकृता भवति । "सत्तअणुकंपत्ति । णिवेदितस्स अणुकंपा कया भवति । सायावेयणिज्जं कम्मं उवचितं भवति । एए दाणगुणा भवंति । तीर्थं च एवं प्रभावितं भवति । दाणे त्ति गयं ।
इदाणिं देवमल्ले त्ति दारं । तित्थकरो पढमाए पोरुसीए धम्मं कहेइ ताव जाव पोरुसीउग्घाडणवेला । सा केरिसी? एत्थ गाहाओ -
राया व रायमच्चो, तस्सासइ पउर जणवओ वा वि । दुब्बलिकंडिय बलिछडिय तंदुलाणाढगं कलमा ॥१२११॥ भाइयपुणाणियाणं, अखंडऽफुडियाण फलगसरियाणं । कीरइ बली सुरा वि य, तत्थेव छुहंति गंधाई ॥१२१२॥ बलिपविसणसमकालं, पुव्वद्दारेण ठाइ परिकहणा। तिगुणं पुरओ पाडण, तस्सद्धं अवडियं देवा ॥१२१३॥
