________________
भासगाहा-११७०-११७९]
पढमो उद्देसो पय पाय मक्खरेहिं मत्ता घोसेहिं वा वि परिहीणं।
अवि य रवि राय हत्थी, पगास सेवा पया चेव ॥११७४॥
"पयपाय०" गाहा । अवि य–किं जारिसो रविस्स पगासो एरिसो किं पावगादीणं होहिति ? जारिसो वा रण्णो सेवाफलो, तारिसो किं अमच्चाईणं? जारिसं हत्थिपयं तारिसं किं कुंथुपयं? एवं किं जारिसं तित्थंकरवक्कं एरिसं सेसाणं? एएण कारणेणं जिणमूलमेव जामि । आयरिओ भणइ -
कोट्ठाइबुद्धिणो अस्थि संपयं एरिसाणि मा जंप।
अवि य तहिं वाउलणा, विरयाण वि कोउगाईहिं ॥११७५॥ "कोट्टाइबुद्धिण०" गाहा । कण्ठ्या । आह- का तत्थ वाउलणा? उच्यते -
समोसरणे केवइया, रूव पुच्छ वागरण सोयपरिणामे । दाणं च देवमल्ले, मल्लाणयणे उवरि तित्थं ॥११७६॥ "समोसरणे केवइया०" दारगाहा । समोसरणि त्ति दारं -
जत्थ अपुव्वोसरणं, जत्थ व देवो महिड्डिओ एइ । वाउदय पुष्फ वद्दल, पागारतियं च अभिओगा ॥११७७॥
"जत्थ अपुव्वोसरणं०" गाहा । [अपुव्वं] नगरं जत्थ जत्थ वा महिड्डिओ देवो एइ, वंदइ तत्थ संवट्टयवायं सुरभिगंधोदएणं निहयरयं रेणुकरणं पुष्फवद्दलयं च । एयं आभिओगिया देवा करेंति । तिन्नि पागारा भवंति । ते को करेइ ? उच्यते -
अब्भितरमज्झबहि, विमाणजोइभवणाहिवकयाओ। पायारा तिन्नि भवे, रयणे कणगे य रयए य ॥११७८॥
"अभितरमज्झ०" गाहा । अभितरिल्लपागारं वेमाणियदेवा करेंति । मज्झिल्लं जोइसिया करेंति । बाहिरिल्लं भवणवासी करेंति । अभितरिल्ले रयणमए, मज्झिल्ले कणगमए, बाहिरिल्ले रययामए ।
मणिरयणहेमया वि य, कविसीसा सव्वरयणिया दारा । सव्वरयणामय च्चिय, पडागज्झयतोरणा चित्ता ॥११७९॥
