________________
तप्पोग्गलाण तग्गहणसहावावगमओ य एयं ति । इय दट्ठव्यं, इहरा तहबंधाई न जुज्जंति ||११|| एयं पुण णिच्छयओ अइसयणाणी वियाणए णवरं । इयरो वि य लिंगेहिं उवउत्तो तेण भणिएहिं ।।१२।। पावं न तिव्वभावा कुणइ, ण बहुमण्णई भवं घोरं । उचियट्ठिइं च सेवइ सव्वत्थ वि अपुणबंधो ति ।।१३।। सुस्सूस धम्मराओ गुरुदेवाणं जहासमाहीए | वेयावच्चे णियमो सम्मद्दिट्ठिस्स लिंगाइं ।।१४।। मग्गणुसारी सद्धो पण्णवणिज्जो कियापरो चेव । गुणरागी सक्कारंभसंगओ तह य चारिती ।।१५।। एसो सामइयसुद्धिभेयओ णेगहा मुणेयव्यो । आणापरिणइमेया अंते जा वीयरागो ति ||१६|| पडिसिद्धेसु अदेसे विहिएसु य ईसिरागभावे वि । सामाइयं असुद्धं सुद्धं समयाए दोसुं पि ||१७|| एयं विसेसणाणा आवरणावगममेयओ चेव । इय दट्ठवं पढमं भूसणठाणाइपत्तिसमं ।।१८।। किरिया उ दंडजोगेण चक्कभमणं व होइ एयस्स | आणाजोगा पुव्वाणुवेहओ चेव णवरं ति ||१९|| वासी चंदणक्पो समसुह – दुक्खो मुणी समक्खाओ । भव - मोक्खापडिबद्धो अओ य पाएण सत्थेसु ।।२०।। एएसिं णियणियभूमियाए उचियं जमेत्थऽणुठ्ठाणं । आणामयसंयुत्तं तं सव्वं चेव योगो ति ||२१|| तल्लक्खणयोगाओ उ चित्तवित्तीणिरोहओ चेव । तह कुसलपवित्तीए मोक्खेण उ जोयणाओ ति ।।२२।।
