Page Text
________________
[६७]
aaaaaaaaaaaaaaaaaaaaaaaaaaaaaaammmmmmmmmmmmmmmmmmmmmmmmmmm
अणुचिया, तहा वि गेण्ह सुनंदाए करं करेण' । तओ भणिओ सेणिएण - 'ताय ! अमुणियपरमत्थाणं नियधूयं देंतो तुमं चेव जाणसि' । सेट्ठिणा भणियं - 'वच्छ ! असरिसगुणेहिं रूवेण सुमिणयसूइओ य तुमं जहा उत्तमपुरिसो' । तेण भणियं – 'जइ एवं ता तुमं चेव जाणसि' । तओ पसत्थवासरे महाविभूईए विवाहिया तेण सुनंदा । तओ तीए सह विसयसुहं [अणुभ]वंतस्स [तस्स] अइक्कंतो कोई कालो । अन्नया तीए सुमिणे दिट्ठो धवलवारणो वयणं पविसंतो । साहिओ पइणो । तेणाऽवि 'पहाणपुत्तजम्मो होहि[इ]'त्ति वुत्तं ।
__ अन्नया संपत्ता वरियारूढा पसेणइरायपुरिसा । तेहिं समप्पिओ से लेहो । तओ आपुच्छिऊण सेट्ठी सह नागरएहि भणिया सुनंदा – 'पिए ! सुप्पसिद्धा वयं पंडरकुड्डा गोवाला रायगिहे । जहियं अम्हेहिं कज्जं ता तत्थाऽऽगच्छेज्जसु' ।
तओ सो आरूढो वरियं । पत्तो रायगिहं । दिट्ठो पसेणई । पणमिओ सबहुमाणं । अन्नया पसत्थदिणे सामंत-नागरा(र)याण स(सा)हिउं निययाभिप्पायं कओ सेणियस्स रायाभिसेओ । कालक्कमेण सो जाओ महानरिंदो त्ति ॥छ।।
इ[ओ] य सुनंदाए गब्भाणुभावाओ 'अमारिघोसणापुव्वयं हत्थिखंधारूढा देमि जम्मग्गिराण महादाणं'ति दोहलो जाओ । संपाडिओ य सेट्ठिणा रायविन्नवणपुव्वयं । तओ पसत्थवासरे पसूया दारयं । बारसाहे य वित्ते कयं से नामं अभओ त्ति । तओ जाओ अट्ठवरिसिओ लेहायरियस्स उवणीओ । तत्थ य पढंतस्स अन्नकुमारेहिं सह कलयलो जाओ । तेहिं भणियं - 'किं अम्हं पुरओ जंपसि, जस्स ते न मुणिज्जए जणओ वि?' तओ तेण संजायविम्हएण सुनंदा पुच्छिया । तेइ(तीए) सेट्ठी दरिसिओ । तेण भणियं - 'फुडं साहसु, न होइ एसो' । तओ साहिओ परमत्थो जहा – 'देसंतराओ आगओ को वि विवाहेऊण तुमंमि उदरत्थे गओ' । तेण भणियं - 'गच्छंतेण किं पि सिटुं न वा ?' तओ तीए 'सुपसिद्धा वयं पंडरकुड्डा गोवाला रायगिहे'त्ति सिटे सुमइत्तणओ तेण नाऊण भणियं जहा – 'मे पिया तत्थ नरनाहो । ता पयट्ट, तत्थ गच्छामो' । तीए वुत्तं – 'जइ एवं ता पुच्छ तायं' । पुच्छिओ य सबहुमाणं । तेण वि महाविभूईए पट्ठाविया सुनंदा अभयकुमारो य । पत्ता य रायगिहे ।
तओ बाहिरुज्जाणे सुनंदं ठविय कइवयपुरिससहिएण पिउदरिसणत्थं पविसंतेण दिट्ठो जुन्नकूवपासे बहुगो लोगो । अभएण पुच्छिओ एगो पुरिसो - 'किमेस लोगो मिलिओ ?' तेण वुत्तं – 'सेणिएण एगणपंचमंतिसयाणि मेलियाणि । ताणं च पहाणमंतिपरिक्खणत्थमिमंमि झिरिंडकूवे वेंटियं पक्खित्तं जो य तं तडट्ठिओ गेण्हइ तस्स राया नियधूयं अद्धरज्जं च देइ, मंतीणं च सामि करेइ' ।
तओ तेण अगडे गंतूण भणिया लोगा - 'भो ! कीस न गेण्हह ?' तेहिं वुत्तं - 'नत्थि गहणे सत्ती' । अभएण वुत्तं – “किमेयं गिण्हिउमन्नो लहइ ?' तेहिं वुत्तं - 'सुट्ठ लहइ' । तओ तेण पक्खित्तो वेंटगोवरि घाएण अन्न(६)गोमयपोद्दो सोसिओ य पलालग्गिणा । तओ सो सारणिजलेण भराविओ अगडो। त[र]माणो य गहिओ वेंटिओ। जाओ य साहुवाओ । नीओ य निउत्तपुरिसेहिं सेणियसमीवं। पायवडणमुट्ठिओ य सहरिसं पसिउं राइणा वुत्तो - 'वच्छ ! कत्तो इहाऽऽगओ ?' अभएण भणियं - 'विन्नागतडाओ' । राइणा भणियं – 'जाणसि भद्दसेट्टि सुनंदं [च] तस्स धूयं ?' अभएण भणियं – 'दारओ' एवमाइसव्वं कहियं । तओ राइणा वुत्तो – 'इदाणिं कहिं सो ?' तेण वुत्तं – 'इहेव चिट्ठइ, जाव... अहं तव पुत्तो
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |