Page Text
________________
[६४]
ह(भव?)वक्कंतीए छउमत्थो चेव कालं करिस्ससि' । तओ भगवं गोसालगमेवं वयासी - 'अहं अण्णाई सोलस वरिसाइं विहरिस्सामि । तुमं पुण गोसाला ! अप्पणा(णो) चेव तेएणं सत्तरत्तस्स अंतो पित्तजरपीडिओ कालं करिस्ससि' ।
___ तओ विब्भलो तत्थेव पडिओ गोसालो विलवंतो गोयमाइसमणेहिं समागंतुं - 'गोसाला ! गुरुपच्चणीयाणमेरिसा चेव गई होउ' द्वि[इच्चाई] बहुहा मम्मवयणेहिं दूमिज्जंतो वि किंचि काउमसमत्थो उप्पाडिओ परिवारेण नीओ नियट्ठाणं । तत्थ य हालाहला नाम कुंभगारी तस्स भत्ता । तीए कओ सीयल्लकट्ठमाइपडीयारो, त[ह] वि डज्झइ ।
तओ सत्तमदिणंते छेयकालो त्ति किंचि सत्थावत्थो लद्धसम्मत्तो नियथेरे सद्दावित्ता भणइ – 'नाऽहं जिणो, किं तु महावीरो जिणो । तस्साऽहं पच्चणीओ कुसीसो । ता मं कालगयं जाणित्ता वामपाएऽणुबंधित्ता वसहीए बाहिं कड्डमाणा "एस गोसालो अजिणो [वि जिण]प्पलावी [मुणिघाई दोसनिहाणं गुरुपडिणीओ]" एवं भणमाणा [नयरीए] विहरेज्जह' । तओ ते सवहसाविया संता [तं] कालगयं जाणेत्ता वसतीए बारं ठवित्ता सावत्थि लिहित्ता लज्जंता तं सव्वं करेंति । गोसालो वि कालगओ संतो अच्चुए कप्पे उक्कोसठिईओ देवो जाओ ।
तओ सामी सावत्थीओ मेंढियगामं गओ । तओ तत्थ गोयमेण पुच्छिओ भयवं - 'कहिं गओ गोसालो ?' 'गोयमा ! अच्चुए कप्पे' । 'तओ चुओ कहिं उववज्जिहिइ ?' सामी भणइ – 'इहेव जंबुद्दीवे भरहे सत्तदुवारे नगरे संमुइरन्नो भद्दाए भारियाए महापउमो नाम पुत्तो होहीइ । सो य राया जाओ समाणो समणाणं निग्गंथाणं निब्भच्छणाईहिं पच्चणीओ होही । अण्णया सो रहवरियाए निग्गओ सुमंगलं अणगारं छटुं छटेण आयावेमाणं काउस्सग्गट्ठियं पासित्ता आसुरत्तो रहमत्थएणं पेल्लविस्सइ पुणो पुणो । तओ सुमंगलो ओहिणा पेच्छित्ता [तस्स] पुव्वभवचेट्ठियं सुनक्खत्ताइदहणं सरह-सारहिं महापउमं भासरासि करिस्सइ । तओ सुमंगलो आलोइयपडिक्कंतो मरिउं सव्वट्ठसिद्धे गंतुं चुओ विदेहे सिज्झिहिइ । [महा]पउमो वि तेण डड्डो सत्तमपुढविनेरइओ भविस्सइ ।।
___ एवं नरयपुढवीसु सत्तसु वि नेरइओ दो दो वाराओ होऊण सव्वासु तिरिक्खजाईसु भुज्जो [भुज्जो] जाहिइ । सव्वत्थ वि सत्थवज्झो दाहेण य मरिहिइ ।
तओ रायगिहस्स बाहिरीए वेसा होउं अभितरीए वि वेसा होही । तओ माहणदारिया गुम्विणी संती दवग्गिणा डज्झिहिइ । तओ अग्गिकुमारेसु तओ मणुएसु बोहिं लभिहिइ पव्वज्जं च । तओ सोहम्माईसु देवलोएसु उववज्जिय सव्वट्ठसिद्धे उववज्झिहिइ । तओ चइत्ता विदेहे वासे अट्ठकुंभेसु(अड्डकुडुंबे) दढप्पइण्णो नाम पुरिसो होऊण केवलनाणं उप्पाडेही । तओ अप्पणोऽतीयटुं अणेयजम्म-मरणपउरं आभोएउं समणाणं अप्पणो चरियं कहिस्सइ, जहा - "मा अज्जो ! तुब्भे वि आयरियाईणं पडिणीया होज्जह"त्ति' ॥छ।। गोसालो त्ति गयं ॥
इओ य भगवं भवियव्वयानिओगेण समुप्पण्णसायसय(साईसार)दाहज्जररोगो अट्ठि-चम्मावसेसो वयणं पि वोत्तुमसमत्थो मेंढियगामे नयरे सालकोट्ठए चेइए समोसढो । तत्थेव देवा देवीओ विज्जाहरा य भगवंतं वंदिऊण स(र?)मणत्थं तत्थेव माओ(लु)आकच्छाहिहाणतरुगणसेन्नं गयणेण गच्छंता परोप्परमुल्लवंति -
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |