Page Text
________________
[५१]
निग्गओ । सा अद्धिई पगया । तओ दासीओ भणंति - 'एस देवज्जओ दिवसे दिवसे एत्थ एइ' । ताहे ताए नायं - 'नूणं भगवओ अभिग्गहो कोई' । तओ निरायं चेव अद्धिई जाया । सुगुत्तो य अमच्चो आगओ, तं भणइ - 'किमम्हममच्चत्तणेण जमेच्चिरं कालं सामी इह हिंडंतो वि भिक्खं न लहइ ? किं च ते विन्नाणेण, जइ एवं अभिग्गहं न याणसि ?' तेण सा आसासिया भणिया य - 'कल्लदिवसे जहा भवइ तहा करेमि' ।
___ एयाए य कहाए वट्टमाणीए विजया नाम पडिहारी मिगावईए भणिया केणइ कारणेण आगया । सा तं उल्लावं सोऊण मिगावईए साहेइ । मिगावई वि तं सोऊण महादुक्खेणाऽभिभूया अईव अधिइं पगया। राया य आगओ पुच्छइ । तीए भन्नइ - 'किं तुज्झ रज्जेणं मए वा ? एवं सामिस्स एवइयं कालं हिंडंतस्स भिक्खाभिग्गहो न नज्जइ ? न वा जाणासि एत्थ विहरंतं ?' तेण आसासिया - 'तहा करेमि जहा कल्ले भवई' ।
ताहे सुगुत्तं अमच्चं सद्दावेइ अंबाडेइ य जहा - 'तुमं आगयं सामि न याणसि ? अज्ज किर चउत्थो मासो हिंडंतस्स' । ताहे तच्चावाई सद्दाविओ पुच्छिओ य सयाणीएणं – 'तुब्भं धम्मसत्थे सव्वपासंडायारा विज्जंति ते तुमं भण' । सुगुत्तो वि भणिओ - 'तुमं पि बुद्धिबलिओ, कहेहि' । ते भणंति - 'महाराय ! बहवे दिव्वाइया अभिग्गहा । ता न जाणिज्जइ अइसयनाणं विणा, को वि भगवया अभिग्गहो गहिओ' ।
तओ रन्ना विविहपगारेहिं दाणटुं संदिट्ठो लोगो । तेण वि परलोगत्थिणा तहेव कयं । तओ सामी आगओ, न य तेहिं वि पगारेहिं गेण्हइ । एवं च ताव एयं ।
इओ य सयाणीओ 'चंपानयरीए दहिवाहणं गेण्हामि'त्ति नावाकडएण गओ आसि । तओ एगाए रत्तीए अचिंतिया नयरी वेढिया । तत्थ दधिवाहणो पलाणो । रन्ना य जग्गहो घोसाविओ । तंमि य घुढे दहिवाहणस्स रन्नो धारिणी देवी धूयाए वसुमईए [सह ए]गेण ल्हसडेण गहिया । निग्गएण रन्ना सह चलिओ सो ल्हसडो भणइ – 'ममेसा भज्जा भविस्सइ, धीयं च विक्किणिस्सं' । सोउं चेमं देवी - 'न नज्जइ किं ममेसा धीया पाविस्सइ'त्ति महा(णो)माणसिएण दुक्खेणं अंतरा चेव कालगया । चिंतियं च ल्हसडेण – 'दुट्ठ मए कयं जं ममेसा भज्जा भविस्सइ'त्ति भणियं । संपयं पुण जइ भणिस्सं ता नूणमेसा वि धीया मरिस्सइ । तओ मे मोल्लं पि न होही' ।
ताहे अणुवत्तंतेण नीया वसुमई कोसंबीए, विक्किणणत्थं चाऽवतारिया हट्टमग्गे । दिट्ठा धणावहेण, चिंतियं च - 'नूणमेसा काइ महाकुलुप्पण्णा कण्णगा । कहमन्नहा एरिसी रूव-लावन्नाइसंपया ? ता मा [आ]वई पावउ त्ति मेल्लावेमि जेणिमीए समं मे गत्ता(मा)गमो होइ(ही)' । तओ जंमग्गियं मोल्लं दाऊण नीया सगिहं, पुच्छिया य - 'काऽसि तुमं ?' न किंचि साहइ । तओ पहाविऊण जिम्वाविया । 'तुहेसा धीय'त्ति वोत्तुं समप्पिया मूलाए । सुसीला [सा] तहा चिट्ठइ जहा समावज्जिओ सेट्ठिपरियणो सेसजणो य तीए सयलसीयलला(सी)लावत्तणओ [सील]चंदण'त्ति नाममुल्लवेंतो सुमिणो वि न विरमइ । पसिद्धा सा तेण 'चंदण'त्ति ।
मूला य तीए गुणावज्जणेण मच्छरिया तुच्छत्तणओ चिंतइ – 'जइ कह वि सेट्ठी इमं कलत्तीकरेइ ता नूणमहमस्सामिणी होमि' । एवं च जंतेसु दिणेसु कयाइ मज्झण्हसमए बाहितो विजणं गिहमागओ सेट्ठी।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |