Page Text
________________
[४५]
पूएइ । पच्छा वाणियग्गामं पहाविओ । तत्थंतरा गंडइया नाम नई । तं सामी नावाए उत्तिण्णो । तओ नाविया सामि नावामोल्लं मग्गंति । तत्थ संखरन्नो भाइणिज्जो चित्तो नाम दूयत्तेण वाणियवट्टाए नावाकडएण
एइ । ताहे तेण मोइओ।
तओ वाणियग्गामं गओ । तस्स बाहिं पडिमं ठिओ । तत्थ आणंदो नाम सावओ छटुं छटेण आयावेइ । तस्स ओहिन्नाणं समुप्पन्नं, जाव पेच्छइ तित्थयरं । वंदइ भणइ य - 'अहो सामी परीसहे अहियासेइ । एच्चिरेण कालेण तुब्भं केवलनाणं उप्पज्जिहि'त्ति कहेइ । तओ सामी सावत्थी( त्थि) गओ। तत्थ दसमं वासारत्तं ॥छ।१०॥ विचित्तं च तवोकम्मं तत्थ काउस्सग्गाई करेइ ।
तओ माणुसट्ठियं(साणुयट्ठियं) नाम गामं गओ । तत्थ विचित्तं काऊण तवोकम्मं आणंदस्स गाहावइस्स घरे बहुलियाए दासीए रसोयणीए भायणाणि खणीकरेंतीए दोसीणं छड्डेउकामाए सामी पविट्ठो । ताए भणियं - '[किं] भगवं ! अट्ठो ?' सामिणा पाणी पसारिओ । ताए परमाए सद्दा(द्धा)ए दिण्णं । पंच दिव्वाणि पाउब्भूयाणि ।
तओ सामी दढभूमिं गओ । तीसे बाहिं पेढालं नाम उज्जाणं । तत्थ पोलासं नाम चेइयं । तत्थ य अट्ठमण भत्तेण ईसिमवणयकाओ ल्हुक्के(लुक्खे)गपोग्गलनिरुद्धदिट्ठी चिट्ठइ ।
___इओ सक्को देवराया भगवंतं ओहिणा आलो(भो)एत्ता सभा[ए] सुहम्माए अत्थाणीवरमज्झगओ सामिस्स नमोक्कारं काऊण भणइ – 'अहो ! भगवं तेलोक्कं अभिभूय ठिओ, न सक्को केणइ देवेण वा दाणवेण वा चाले' । तत्थ य संगमो नाम सोहम्मकप्पवासी देवो सक्कसामाणिओ अभवसिद्धिओ। सो भणइ - 'अहो ! देवराया रागेण उल्लवेइ । को माणुसो देवेण न चालिज्जइ ? अहं चालेमि' । तं च सक्को न वारेइ - ‘मा जाणिही जं परनिस्साए भगवं तवोकम्मं करेइ' । अहवा भणियव्वं 'भगवओ अवस्समुवसग्गेहिति' । भ[णि]यं च -
उवसग्ग-गब्भहरणं, इत्थीतित्थं अभाविया परिसा । कण्हस्स अवरकंका, अवयरणं चंद-सूराणं ॥ [तित्थोगालीप्रकीर्णके ८८८] हरिवंसकुलुप्पत्ती, चमरुप्पाओ अट्ठसया सिद्धा ।
अस्संजयाण पूया, दस वि अणंतेण कालेणं ॥ [तित्थोगालीप्रकीर्णके ८८९] तओ संगमओ संपत्तो धूलिवरिसं वरिसेइ । तेण य सामी पूरियसव्वसोत्तो निरुस्सासो जाओ । तह वि झाणाओ न चलिओ ॥१॥ तओ कीडियाओ विउव्वइ । ताओ वज्जतुंडेहिं एक्कसोत्ताओ [अणुपविसित्ता अण्णेण] सोत्तेण नीसरंतीओ चालिणीसरिसं सामि कुणंति । तह वि न चलिओ ॥२॥ ताहे उसे विउव्वेइ । ते तिक्खतुंडेहिं डसंति । तह वि न चलिओ ॥३॥ ताहे घव(य)हिल्लाओ विउव्वइ । ताहिं [पि] न चलिओ ॥४॥ ताहे विच्छुए विउव्वइ । ते कंटएहिं विचंति । तह वि न चलिओ ॥५॥ तओ नउले विउव्वइ । ते तिक्खदाढाहिं सरीरं खंडंति । तह वि न चलिओ ॥६। तओ सप्पे विउव्वइ । ते उग्गविसा डाहज्जरकारगा डसंति । तह वि न चलिओ ॥७॥ तओ उंदुरे विउव्वइ । ते सरीरं कुरुडित्ता मुत्तेणं सिंचंति । तह वि न चलिओ ॥८। तओ हत्थिरूवं विउव्वइ । सो सुंडाए उच्छालेत्ता पडतं तिक्खदंतेहिं विधिऊण भूमीए पाडिय मुत्तेणं सिंचंतो चलणेहिं मलइ । तह वि न चलिओ ॥१०। तओ पिसायं विउव्वइ । सो विविहं बीहावेइ । तह वि न चलिओ ॥११॥ तओ वग्धं विउव्वइ । सो नह-दाढाहिं फालित्ता
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |