Page Text
________________
[४२]
wwwwwwwwwwwwwwwwwwwww
सालज्जा वाणमंतरी । सा भगवओ तेयमसहमाणा जहा कडपूयणा वाणमंतरी तहेव भगवओ पडिमागयस्स उवसग्गं करेइ । ताहे संता महिमं करेइ ।
तओ भगवं त(ग)ओ लोहग्गलं रायहाणि । तत्थ जियसत्तू राया । सो अण्णेणं राइणा समं विरुद्धो। तस्स चारपुरिसेहिं सामी सगोसालो गहिओ । पुच्छिज्जंतो वि न किंपि कहइ । तओ हेरिओ त्ति काऊण रन्नो अत्थाणवरगयस्स उवट्ठविओ । तत्थ य उप्पलो अट्ठियगामाओ पुव्वमेवाऽऽओ चिट्ठइ । सो य आणिज्जंतं दट्ठण भगवंतं तिक्खुत्तो वंदइ । पच्छा सो भणइ – 'न एस हेरिओ, किंतु सिद्धत्थरायपुत्तो धम्मचक्कवट्टी एस भगवं । लक्खणाणि [से] पेच्छह' । तओ दटुं सक्कारिऊण मुक्को ।
तओ सामी पुरिमतालं एइ । तत्थ वग्गुरो नाम सेट्ठी । तस्स भद्दा भारिया । सा य वंझा बहूणं देवीण य बहुविहोवाइयाणि दाऊण सुट्ठ परिस्संता । अण्णया सगडंमुहे उज्जाणियाए गया दो वि एगत्थ पासंति जुण्णदेउलं सडिय-पडियं । तत्थ मल्लिसामिणो पडिमा, तं नमसंति । 'जइ अम्ह दारओ दारिया वा जायइ ता एवं चे[वं] देउलं [नवं] करिस्सामो एयभत्ताणि य होहामि(मो)'त्ति भणित्ता णिग्गया । तत्थ य अहासंनिहियवाणमंतरीदेवयाए पाडिहेरं कयं । जाओ भद्दाए गब्भो । तओ गब्भदिणाओ चेव वग्गुरो तं देउलं कराविउमारद्धो । तहा तत्थ तिसंझं पूयं करेइ । पव्वइयगा य अल्लियंति । एवं सो सावगो जाओ।
___इ[ओ] य सामी विहरमाणो सगडमुहस्स उज्जाणयस्स [नगरस्स य] मग्गंतराए पडिमं ठिओ । वग्गुरो य हाओ उल्लपडओ सपरियणो महाविभूईए विविहकुसुमहत्थो आययणं अच्चओ जाओ । ईसाणो य देविंदो पुव्वागओ सामि वंदित्ता पज्जुवासेइ वग्गुरं च वच्चंतं पासइ । भणइ य - 'भो वग्गुरा ! तुमं पच्चक्खतित्थगरस्स महिमं न करेसि तप्पडिमं अच्चओ जासि, जमेसो वीरवद्धमाणो'त्ति । ताऽऽगओ 'मिच्छा मि दुक्कडं' काउं खामेइ, महिमं करेइ ।
____तओ सामी उण्हागं वच्चइ । एत्थंतरा वहू-वराणि संमुहमागच्छंति । ताणि पुण दोण्णि वि विरूवाणि उदंतुराणि य । तत्थ गोसालो भणइ – 'अहो ! इमो सुसंजोगो ! । अवि य -
तत्तिल्लो विहिराया, जाणइ दूरे वि जो जहिं वसइ ।
जं जस्स होइ सरिसं, तं तस्स बिइज्जयं देइ ॥' जाहे न ठाइ ताहे [ते]हिं पिट्टित्ता वंसीकुडंगे छूढो । तत्थ ठिओ उत्ताणओ अच्छइ । वाहरइ सामि । ताहे सिद्धात्थो भणइ – 'सयं खामवं कयं तए' । ताहे सामी गंतुं अदूरे पडिक्खइ । पच्छा ते भणंति - 'नूणं एस देवज्जस्स पीढियावाहओ वा छत्तधारओ वा आसि तेणेस ठिओ' । ताहे मुक्को । तओ पहिएहि भणियं – 'सुंदरं तुब्भेहिं कयं । जुत्तमेसो देवज्जगस्स पडिचारगो मुक्को' ।
___ तओ सामी गोभूमि वच्चइ । तत्थंतरं(रा) अडवी घणा । तीए सया गावीओ चरिति तेण गोभूमी । तत्थ गोसालो गोवालए भणइ – 'अरे रे मिलेच्छा ! एस पंथो कहिं वच्चइ ?' । [ताहे ते गोवा भणंति - 'कीस अक्कोससि ?' ताहे सो भणइ – 'असूयपुत्ता ! खउरपुत्ता ! सुट्ठ अक्कोसामि' । ताहे तेहिं मिलित्ता पिट्टित्ता बंधित्ता वंसीए छूढो । तत्थ अण्णेहिं पुणो मोइओ जिणुवसमेणं ।] तओ सामी सगोसालो रायगिहं गओ । तत्थऽट्ठमं वासारत्तं ॥छ। ८ ॥
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |