Page Text
________________
[४१]
छिन्नट्ठाणं । तत्थ चोरो रुक्खविलग्गो पलोएइ । तेण दिट्ठो भणइ – 'एक्को नग्गो समणो एइ' । ते य भणंति - 'सो न बीहेइ, नत्थि हरियव्वं ति । अज्ज से नत्थि छोट्टिक्कओ जं अम्हे परिभवई' । तओ पत्तो गोसालो । पंचहिं चोरसएहिं 'माउलो'त्ति भणंतेहिं पत्तेयं पत्तेयं भिरिडिओ साइएणं । तओ सो चिंतेइ - 'वरं सामिणा सहेज्जओ, कोइ मोएइ सामि, तस्स य निस्साए मम वि मोयणं भवइ' । ताहे सामि गवेसिउमारद्धो ।
सामी वि वेसालि गओ । तत्थ कम्मयरसालाएऽणुनवित्ता पडिमं ठिओ । इओ य तत्थेगो कम्मकरो छम्मासे जाव ओलग्गंतो लट्ठो लग्गो सोहणतिहिकरणे आउहाणि गहाय तं सालमागच्छंतो सामि [पा] सित्ता 'अमंगलं ममेसो, ता आहणामि'त्ति पहाविओ घणं उप्पाडिऊण । सक्केण य ओही पउत्तो जाव पेच्छइ ताव झत्ति तीए चेव वेलाए सक्को समागम्म तस्सेवुवरिं तं घणं पाडेइ, तह चेव मओ । सक्को वि वंदित्ता गओ ।
तओ सामी गामायं नाम सन्निवेसं गओ । तत्थुज्जाणे बिहेलए बिभेलओ णाम जक्खो । सो भगवओ पडिमाठियस्स महिमं करेइ । तओ सामी सालिसीसयं नाम गामं गओ । तत्थुज्जाणे पडिमं ठिओ । माहमासो य वट्टइ । तत्थ कडपूयणा नाम वाणमंतरी सामि दट्ठण तेयं असहमाणी तावस(सी)रूवं विउव्वित्ता परिहियवक्कला जडाभारधारिणी सव्वं सरीरं पाणिएण उल्लित्ता देहमि उवरिं सामिस्स ठाउं धुणइ वायं च विउव्वइ । जइ अन्नो होज्जा तो मरेज्जा । तं च तिव्वं वेयणमहियासेंतस्स सामिणो पाणयकप्पट्ठियदिट्ठखेत्तमाणो चउव्वीससहियनववरिसलक्खंतोऽतीयाणागयभाववियाणओ जो अवही होंतो सो सव्वलोयप्पमाणो असंखेज्जवरिसंतोऽतीयाणागयभावपरिच्छेयओ संजाओ त्ति ।
__उवसंताए य कडपूयणाए भगवं मेढियं(भदिय) नाम नगरं गओ । तत्थ छठें वासावासं उवगओ त्ति ॥६॥
एत्थ य वरिसाकाले पुणो वि छठे मासे गोसालो मिलिओ भगवओ । तत्थ चाउम्मासखमणं विचित्ते य अभिग्गहे कुणइ भगवं ठाणाईहिं । बाहिं पारित्ता पच्छा मगहविसए विहरइ निरुवसग्गं अट्ठ उउबद्धिए मासे।
तओ सामी आलंभियं नयरिं एइ । एत्थ सत्तमं वासा[रत्तमुवा]गओ चाउम्मासखमणेणं ॥छ।७॥
तओ बाहिं पारेत्ता कुंडागनामसन्निवेसं एइ । तत्थ वासुदेवस्स घरे सामी पडिमं ठिओ । कोणे गोसालो वि वासुदेवपडिमाए अहिट्ठाणं मुहे काउं ठिओ । तस्स य पूजारओ आगओ तं पेच्छइ तहा ठियं । ताहे सो चिंतेइ - 'मा कोइ भणिस्सइ असहमाणो धरिओ' । तओ गामे जाइउं कहेइ - 'एह, पेच्छह, भणिहिह - रागिओ' । ते आगया, दिट्ठो पिट्टिओ बद्धो य । तओ अण्णे तेसिं चेव मज्झे भणंति - 'पिसाओ एसो, किं बज्झइ ?' ताहे मुक्को ।
__ तओ गओ सामी जत्थ मद्दणा नाम गामो । तत्थ बलदेवस्स घरे अंतो कोणे पडिमं ठिओ । गोसालो मुहे तस्स नियलिंगं दाउं ठिओ । तत्थ वि तहेव हओ बद्धो य । तओ पुणो वि 'पिसाओ एसो' त्ति काऊण मुक्को ।
तओ सामी बहुसालगो नाम गामो, तत्थ गओ । तत्थ सायलं (सालवणं) नाम उज्जाणं । तत्थ
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |