Page Text
________________
[३७]
तओ सामी निग्गंतूण पत्तकालयं गओ । तत्थ वि तहेव अ(सु)ण्णे घरे ठिओ । गोसालो तेण भएण अंतो ठिओ । तत्थ खंदो नाम गामकुंढपुत्तो अप्परेज्जाए(अप्पणिच्चियाए?) दासीए समं महेलाए लज्जंतो तमेव सुन्नघरमागओ । तेणाऽवि तहेव पुच्छिए तहेव तुहिक्का अच्छंति । ततो तेसिं निग्गच्छंताणं गोसालेण हसियं । ताहे पुणो वि पिट्टिओ । ताहे सामि खिंसइ – 'अम्हे भ(ह)म्मामो तुब्भे न वारेह? ता किं अम्हे तुब्भे ओलग्गामो ?' ताहे सिद्धत्थो भणइ – 'तुमं अत्तदोसेण हम्मसि । कीस तुंडं न रक्खेसि?'
तओ भगवं कुमारसन्निवेसं गओ । तत्थ चंपगरमणिज्जे उज्जाणे भगवं पडिमं ठिओ । इओ य पासावच्चिज्जो मुणिचंदो नाम सूरी बहुस्सुओ बहुसीसपरिवारो तंमि सण्णिवेसे कूवणयस्स कुंभारस्स सालाए ठिओ, जो य जिणकप्पपडिमं करेइ । सीसं गच्छे ठवेत्ता नियसत्तपरिक्खणत्थं बाहिं काउस्सग्गं देइ । तओ गोसालो सामि भणइ - ‘एस भिक्खाकालो, हिंडामो' । सिद्धत्थो भणइ - 'अज्ज अम्हे उववासिया' । पच्छा सो हिंडंतो पासावच्चिज्जे पासइ । भणइ य - 'के तुब्भे ?' ते भणंति - 'अम्हे समणा निग्गंथा ?' सो अप्पणो आयरिए(य) वण्णइ – 'एरिसो महप्पा । तुब्भेत्थ के ?' ताहे तेहिं भणियं - 'जारिसो तुमं तारिसो धम्मायरियो वि ते सयंगिहीयलिंगो' । ताहे सो रुट्ठो - 'मम धम्मायरियं निंदह?' त्ति 'जइ मम धम्मायरियस्स तवो तो तुम्हं पडिस्सओ डज्झउ' । ते भणंति - 'न तुम्हाणं भणिए डज्झामो' । ताहे सो गओ साहइ सामिस्स - 'अज्ज मए सगंथा सर(म)णा दिट्ठा, निदंता य तुब्भे मए एवं सविया' । तओ गोसालो सिद्धत्थेण भणिओ - 'ते पासावच्चिज्जा साह[वो], न ते डझंति' ।
ताहे रत्ती जाया । ते य मुणिचंदायरिया बाहिं उवस्सयस्स पडिमं ठिया । सो य कूयणओ तद्दिवसं सेणिभत्ते पाऊण वियाले एइ अइमत्तेल्लओ जाव पासइ ते मुणिचंदायरिए । ताहे सो चिंतेइ - 'एस चोरो' । तेण ते गलए गहिऊण निरुस्सासा कया न य झाणाओ कंपिया । ओहिणाणं उप्पण्णं आउयं च निट्ठियं । देवलोगं गया । अहासन्निहिएहिं वाणमंतरेहिं महिमा कया । ताहे गोसालो बाहिं ठिओ पेच्छइ देवे उ(ओ)वयंते निवयंते य । तओ जाणइ '[ए]स डज्झइ सो तेसिं उवस्सओ' । साहइ सामिस्स - 'भगवं ! सो तेसिं पडिणीयाणं उवस्सओ डज्झइ' । [सिद्धत्थो भणइ – 'न तेसिं उवस्सओ डज्झइ] किंतु आयरियाणं ओहिणाणं उप्पण्णं, तओ देवलोगं गया । तेसिं देवा महिमं करेंति' ।
ताहे सो गओ [तं] पएसं । जाव देवा महिमं. काऊण पडिगया, ताहे तस्स गंधोदगवासं पुष्फवासं च दट्टण अब्भहियजायहरिसो गोसालो ते साहुणो गंतुमुट्ठवेइ – 'अरे ! तुब्भे महासर(मुरु?)क्खा एरिसगा चेव बोडिया हिंडह, जं बाहिं आयरियं कालगयं पि न याणह ? सुवह रत्तिं सव्वं ?' । ताहे ते जाणंति - 'सच्चिल्लओ पिसाओ, रत्तिं पि हिंडइ' । ताहे तस्स सद्देण उट्ठिया गया आयरियसकासं, जाव पे[च्छं]ति कालगयं । ताहे ते अद्धिइं करेंति - 'अम्हेहिं न नाया आयरिया कालं करेंता' । ते य निब्भच्छेत्ता समागओ गोसालो ।
___ तओ भगवं चोरागं सन्निवेसं गओ । तत्थ य उड्डंबालगा नाम चोरा । तेहिं हेरिओ त्ति काऊणं निरुद्धो सामी गोसालो य । बद्धो कूवे ऊसारेता पुणो पुणो नीसारिज्जइ । एत्थंतरंमि तत्थेव निवसमाणीओ सोम(मा)-जयंतीनामगा(ओ) उप्पलस्स दुवे भ(गि)णीओ पासावच्चिज्जाओ जाहे न तरंति संजमं काउं ताहे परिव्वाइयत्तणं करेंति, ताहिं सुयं – 'एरिसा के वि दो जणा उड्डेबालएहिं कूवे पवेस-नीसारिज्जंति' ।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |