Page Text
________________
[३४१]
विक्कमाइच्चराएणं । चिंतिउं च 'न जाणागि इमेसि केरिसो आसीवाओ'त्ति कओ से दिट्ठिप्पणामो । लक्खिउं च तब्भावमुब्भविय(मुद्धट्ठिय)हत्थेण सिद्धसेणेणाऽऽदिट्ठो महासद्देणं धम्मलाभो । राएण छइल्लत्तणेणाऽऽवज्जिएणं दव्वाविया से दव्वकोडी । भणियं च - करावि[य]रायपारिग्गहिएण विक्कमाइच्चस्स वायए ठिईए ।
धम्मलाभो त्ति वुत्तंमि, दूरादुस्सियपाणिणो ।
साहुणो सिद्धसेणस्स, देइ कोडिं निवाहिवो ॥ निवेइया य सा रायदिण्णा दव्वकोडी सिद्धसेणेणं गुरुस्स । तेणाऽवि संघस्स । संघेण वि कओ तीए साहारणसमुग्गओ ।
__ लज्जंतो य ‘पाययं जिणसासणं'ति लोउत्तीए सिद्धसेणो विण्णवइ संघं – 'जइ मण्णह तो करेमि सक्कयं [सव्वं] पि सिद्धंतं' । संघो भणइ – "चिंतिएण वि इमेण पायच्छित्ती, किं पुण जंपिएण ? ता वरसु तुं पायच्छित्तं, जंमि पवज्जिऊण अ चत्तलिंगं सुण्णाराम-देउलाईसु बारसवरिसाणि जाव विचित्तं तवोकम्मं तं पारंचियं नाम । भणियं च -
आलोयण-पडिक्कमणे, मीस-विवेगे तहा विउस्सग्गे ।
तव-छेय-मूल-अणवट्ठए य परंचिए चेव ॥ [आ.नि. १४२८] वोच्छिण्णं च तया दढसंहणणाभावओ पारंचियं तहा वि 'मा अण्णो वि कोवेवं ववसउ'त्ति भयजणणत्थमणुण्णाओ संघेण सिद्धसेणो । सो य बाहिमुज्जेणीए कुडंगेसरदेउलत्थो पारंचियसेवी इव जयंतो पुच्छिज्जइ जणेण वयविसेसं परं न किंचि साहइ । तओ कहियं रन्नो । तेणाऽवि तत्थाऽऽगम्म सयं पुच्छिओ दरिसणपहावणमिच्छंतो सिद्धसेणो भणइ – 'धम्मिओऽहं' । राया भणइ - 'जइ एवं ता किं न थुणसि कुडंगेसरं ?' सिद्धसेणो भणइ – 'न सहइ ममेसो थुई' । राया भणइ – 'कया ?' सिद्धसेणो . भणइ - 'कल्लं' । नाउं चेमं बीयदिणे मिलिओ कुडंगेसरपुरओ सपुरजणवओ रायाइलोओ । तम्मज्झोवविद्वेण य सिद्धसेणेण पारद्धा बत्तीसियाहिं जिणथुई । एत्थंतरंमि य दिण्णोवओगो धरणिंदो दरिसणकज्जं ति तत्थाऽऽगओ तुरियं । दंसिया य तेण कुडंगेसरसीसाओ नीसरंती पाससामिपडिमा । कमंकमेण य बत्तीसइम-बत्तीसियासमत्तीए पडिपुण्णं तं च दट्टण विम्हिओ रायाइलोओ । तओ सिद्धसेणो भणइ - 'राय ! महत्थुइसहो एसो सो देवाहिदेवो' । दटुं च तहाऽइसयं संबुद्धा बहवे पाणिणो । धरणिंदविन्नविएण य संघेण पवेसिओ सहरिसमुज्जेणीए सिद्धसेणो पइट्ठिओ य तप्पभिइ सो संघेण दिवायरो त्ति । जओ पुव्वगयवायगो वि जो विसेसेण सासणुज्जोयगो सो दिवायरो नाम । विज्जंति य ताव संपयं पि बत्तीसियाओ जासिं पहावओ कुडंगेसरसीसुट्ठियपाससामिपडिमा घसिज्जंती वि पच्चणीयजणेणऽज्ज वि दीसइ पुणो पुणो समुल्लिहंती ।
एवं च मिच्छदिट्ठिदप्पदलणो विहरिओ(3) सिद्धसेणदिवायरो गओ देवलोगं तओ विप्फुरिया से [*पडिवक्खा वाईणो*] ।
फुरंति वाइखज्जोया संपयं दक्खिणावहे ।। नूणमत्थंगओ वाई सिद्धसेणदिवायरो ॥छ। सिद्धसेणदिवायरो त्ति गयं ॥छ।।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |