Page Text
________________
[३३५]
दवावेउ देवो' । तओ रण्णा निरूवियं पासोवविट्ठाए सुट्ठ वियक्खणाए भोगवईविलासिणीए समुहं । सा वि परमसावियत्तणओ ‘एसो दरिसणपहापहावणाए समओ'त्ति चिंतित्ता भणइ -
'सगुणकित्तणं किर रण्णो, तावऽण्णजणिदुहरिसमुल्लसइ ।
जा ललइ न पालित्तय-सूरिरवी निरुवमगुणंसू' ॥ सोउं चेमं राया भणइ - 'को एस पालित्तयसूरी ?' तीए वि साहियं सव्वं तच्चरियं । तं च सोउं विम्हिओ राया भणइ – 'कत्थ सो संपयं चिट्ठइ ?' तीए वि 'मन्नखेडे'त्ति कहिए रन्ना सूरिसंगमुम्माहिएणाऽऽणत्तो तस्साऽऽणयणत्थं संकरो नाम जा संधिविग्गहिओ ताव मच्छरिओ बिहप्फई भणइ - 'देव ! बुद्धिकिरणेहिं मम पुरओ सो न सूराइही' । पंचालो भणइ – 'सूराईओ वि कवित्तकिरणेहिं मम पुरओ अत्थमिही' । भोगवई भणइ – 'देव ! अत्थमिउं पि पुणो सो सूराइहि त्ति तमाणवउ' । [ताहे] रण्णा 'अहो ! मरिउं पि जो जीवइ तस्साऽपुव्वं विउसत्तणं । ता संकर ! मण्णखेडे गंतुं कण्हडरायं च मोक्कल्लाविऊणाऽऽणेसु सिग्धं पालित्तयसूरिं'ति वोत्तुं विसज्जिओ संकरो । तेणाऽवि ववसिए नियसामिसमाइटे सुट्ठ समाणंदिओ कण्हडराओ । पट्ठविओ यऽणेण सव्वत्थोचियकिच्चसंपायणत्थं निउत्त-नियसुपरिवारसामग्गीए विचित्तसंघसहिओ पालित्तयसूरी । ___पत्ते य तंमि पइट्ठाणपुरासण्णं जाणाविओ संकरेण सालिवाहणो । सो वि हरिसविसेसओ कारित्तु पुरे हट्टसोहाइमहूसवं सयं संचलिओ सपरिवारो जा सूरिसम्मुहं तावाऽऽगओ लोयप्पघोसं सोउमन्नेहिं सहिओ बिहप्फई भणइ – 'देव ! संपयं चेव परिक्खिस्सं सूरिबुद्धि' । राया भणइ – 'परिक्खसु' । सो भणइ - 'अत्थि कोइ तारिसो देवपरिवारो जो जंतावेंतो वि हत्थट्ठियमुहरभायणाओ नोदगाणं छड्डेज्जा ?' रण्णा वि 'अत्थि'त्ति वोत्तुं सहाविओ हीरओ नामाऽईव थिरहत्थो सूरवालो । सो वि 'जओ'त्ति काऊणुवट्ठिओ पुरओ । दरिसिओ बिहप्फइस्स । तेणाऽवि साहिओ जहा सूरिबुद्धिपरिक्खणोवाओ तहेव रण्णा सिक्खवित्ता पेसिओ सूरिसमीवे विधिरियघयभरियवट्टयहत्थो हीरओ । सो वि गओ तं दरिसित्ता सूरि भणइ - 'मंगलीयमिमं तुम्हें सम्मुहं पवीणपुरिसेहिं पेसियं' । सूरिणा वि लक्खियं जहा – 'बहुलाधारत्ताइधम्मेहिं वट्टयतुल्लं पुरमिमं मइमेहाइगुणावहत्तणओ पुव्व(घय)तुल्लेण पंडियजणेणाऽईव मुहरं, ता तुम्हारिसाणं नेहाऽवगासो त्ति जाणाविओऽहं दायपट्ठि(रायपट्ठि)द्धायण्णुणा(?)' । तेण सुमुह-संवेहगत्ताइ गुणभावओ सारसूईसमो जो विउसुत्तमो सो मुहरेऽपि सम्माइ त्ति जाणावणत्थं साहुसयासाओ घेत्तुं तग्घयमज्झे छुहिऊणुद्धरिया धारिणीविज्जाए सुहमसुहं(उड्डमुहमेगा सूई?) तओ पुणो वि विसज्जिओ हीरओ। पत्तो रायंतियं । दुटुं च . तहट्ठियं सूई विसण्णो बिहप्फई । पमुइएण य रण्णा महाविभूईए सयं पवेसिओ पइट्ठाणपुरे पालित्तयसूरी । सम्माणिओ जहोचियं ।
तओ निसुया सपरिवारेण सूरिविरइया सबहुमाणं कव्वरसाउला तरंगवई नाम कहा । भाविओ वि तीए जाव विउसजणो ताव मच्छरिओ पंचालो । सो य मइमेहाधारिणा बलिओ त्ति भणइ - 'देव ! चोरिया ममाऽणेण तहा तदण्णेहि य' । 'कहं नज्जइ ?'त्ति वुत्ते कहिया तेण वि जुत्तीए तरंगवई । चुरक्कंते य बहुसो वइयरमिमं जणे लज्जिओ मणागं संघो । तब्भणिओ य सूरी संकेयपुव्वमेगदिणे कयमरणचे?ओ कुकुहियापविठ्ठो जा न निज्जइ ताव समंतओ तप्पसंसं कुणइ जणो । तम्मज्झट्ठिओ य पंचालो वि पच्छुत्ताविओ महया सद्देणुद्धठियबाहू पुणो पुणो पढइ -
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |