Page Text
________________
[३२७]
तओ गया वसहीमज्झे । दिट्ठा य दसासुयखंधं परावत्तिता सूरिणो । वंदिया य परमभत्तीए । धम्मलाभिउं च सा भणिया सूरीहिं - 'सेट्ठिआणिए ! किमेगागिणी केणाऽवि कारणवसेणाऽऽगया ?' साहिए य तीए जहावट्ठियवुत्तंते सुओवउत्तेण सूरिणा समाइ8 तव्वेलानिमित्तवसओ जहा - 'भविस्संति ते पुत्ता । किं तु जेट्ठो पुत्तो दसवरिसोवरि जउणानईए पुरओ चिट्ठतो [न] जीवाही(जीविही)' । सोउं चेमं पडिमा भणइ – 'भगवं ! पढमपुत्तं तुम्हमहं सीसं दाहामि' । सूरीहिं भणियं – 'जइ एवं ता तं चिरजीवियमम्हे काहामो' । तओ 'तह'त्ति काउं गया सगिहं पडिमा । साहिओ य तीए सेट्ठिस्स वुत्तंतो। तेणा वि तं पडिवज्जित्ता सहरिसं सा भुत्ता रत्तीए । दिट्ठो य णे सुविणयंमि विचित्तरयणमओ मुहे पविसंतो नागो । संभूओ य तस्समए तीसे नागकुमारो व्व [इ]द्धो गब्भे पुत्तो । पडिबुद्धाए य साहिओ सुविणओ भत्तारस्स । तेण भणियं - "पिए ! सुपुत्तो ते होही' ।।
सुहंसुहेण य वड्डमाणे गब्भे जाओ तीसे दोहलो जह – 'सुमिण[दि]ट्ठ-सेल-काणणाईसु सयं दाणं देमि' । साहिए य सेट्ठिणा पूरिओ सो सविसेसो । तओ समयंमि पसूया पडिमा सव्वलक्ख-संपुण्णं पुत्तं । करावियं च सेट्ठिणा महापमोएण वद्धावणयाइकिच्चं । पुण्णे य मासे तस्सुप्पत्तिसुविणाणुसारेण ठवियं से गुरूहिं नामं नागिंदो त्ति । समप्पिओ य सो नेऊण 'एसो सो तुम्हं सीसो'त्ति वोत्तुं सूरीणं । तेहिं विसेसलक्खणाणि दटुं भणियं - 'होही एसो महंतो पवयणपुरिसो । ता सम्मं संगोवेह तुब्भे जावट्ठ वरिसाणि' । तेहि वि तहेव कए संगहिओ सूरिणा नागिंदो अट्ठमवरिसे । पव्वाविओ य सुमुहुत्ते महाविभूईए। जाया य कुलुद्धरणा अण्णे पुत्ता पडिमाए ।
__ चेल्लओ य कंमि वि दिणे सन्निहियगेहाओ घेत्तूणाऽऽगओ चउत्थरसियं । ठिओ पुरओ भणिओ य सूरिणा – 'जाणासि आलोइउं ?' सो भणइ – 'तुम्हं पसाएणं' । सूरी भणइ – 'दरिसेसु पसायवण्णियं' । चेल्लओ भणइ -
'अंबं तंवच्छीए, अपुप्फियं पुष्पदंतपंतीए ।
नवसालिकंजियं नववहूए कुडएण मह दिण्णं' ॥ सोउं चेमं सूरी भणइ – 'अहो ! सिंगारग्गिणा पलित्तो चेल्लओ' । तेण भणियं - 'कन्नए पसाएण कुणंतु भयवंतो जेण पालित्तो होमि' । तओ चमक्किओ सूरी सायरं निवेसिऊणाऽऽसणे तं पुच्छइ वायरणच्छंदालंकाराइ । तेण य बालभावाओ साहुसेवावहारियं साहियं सविसेसं । अवि य -
___जं किंचि सुयं दिटुं, पण्णा-मेहागुणेण तं सयलं ।
साहइ सनिम्मियं पिव, पालित्तो सुकयसंपुण्णो ॥ तओ सूरीहिं समुदायं सद्दिऊण भणियं – 'भो ! एस सो मए गुणपगरिसेणाऽऽलित्तो त्ति पालित्तो नाम अज्जप्पभिई पइट्ठिओ तुब्भेहिं सम्ममुवचरियव्वो' । तेहिं वि 'तह' त्ति पडिवण्णो । सूरिणा जोग्गो त्ति भावोवहाणरूवेणोसरणाकप्पेणाऽणुजाणिओ सयलसुत्तत्थेसु । निवेसिओ य संघसम्मएण अट्ठवरिसो च्चिय नियपए पालित्तयसूरी । तओ भणिओ संघो नागहत्थिसूरीहिं - जंघाबलपरिक्खीणा अम्हे न समत्था विहरिउं । संघपुरिसो य बालो वि होउं पालित्तयसूरी । परं जउणानईए परओ च्चिय विहरंतस्सेमस्स कुसलं ति सिट्ठमासि पुव्वि चेवऽम्हेहिं । ताऽणुजाणेउ संघो जेण पेसेमि इमं महुराइदेववंदणत्थं' । सोउं
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |