Page Text
________________
[२७६]
छउमत्थसमयचज्जा, ववहारनयाणुसारिणी सच्चा । तं तह समायरंतो, सुज्झइ सव्वो वि सुद्धमई ॥ [विशेषाव० २३७९] जइ जिणमयं पवज्जह, ता मा ववहारदसणं मुयह ।
ववहारनओच्छेए, तित्थुच्छेओ जओऽवस्सं ॥ [तित्थोगाली. ८६९] एवं च बहुसो पण्णविज्जंता वि जाहे न पडिवज्जंति ताहे संघबाहिरा कया । सामिमुत्तिसमयाओ य तया चोद्दसुत्तराणि दो वाससयाणि त्ति ।
ते य विहरता रायगिहं नगरं गया । तत्थ मोरियवंसप्पसूओ बलभद्दो नाम राया समणोवासओ। तेण ते आगमिया जहा 'समागया' । ताहे तेणं पुरिसा आणत्ता – 'वच्चह गुणसिलए चेइए । ते इह आणेह। ताहे तेण(हिं) आणीया । भणियं च रण्णा – 'लहुं कट्ठ(ड)गत्थे काऊणिमे हत्थीहिं मद्दावेह' । ताहे हत्थीहिं कडएहिं च आणीएहिं निण्हवा भणंति - 'अम्हे जाणामो जहा तुमं सावओ' । राया भणइ - 'कहं जाणिज्जइ जहाऽहं सावओ मिच्छदिट्टी वा ? तुब्भे उण चोरा वा हेरिया वा घायगा वा ?' ते भमंति -- 'अम्हे समणा निग्गंथा' । सो भणइ - 'किह तुब्भे समणा ? जओ अव्वत्तं सव्वं पि ता कहं नज्जइ समणा वा गिहत्था वा तुब्भे ? अहं पि समणोवासओ वा न वा ? तम्हा पडिवज्जह ववहारनयं' । तओ संबुद्धा लज्जिया पडिवण्णा निस्संकं जहा - 'समणा निग्गंथा अम्हे' । ताहे रण्णा 'जमेवमंबाडिया तुब्भे तं संबोहणत्थं मए कयं' ति वोत्तुं सम्माणित्ता य मुक्का । अज्जासाढसीस त्ति गयं ॥छा।
अज्जासाढसीसविरोहओ य सत्तमवरिसे संजाओ निण्हओ आसमित्तो त्ति ॥ आसमित्तकहा भण्णइ -
मिहिलाए नयरीए लच्छीहरे चेइए महागिरी आयरिया । तत्थ तेसिं सीसो य कयाइ अणुप्पवायपुव्वे अणिच्चत्तभावणासंभूयं सुत्तं परावत्तंतो 'सव्वं खणे खणे विणस्सइ'त्ति भंसियमई विण्णाओ कोडिण्णगुरुणा भणिओ य - 'भद्दा ! एगंतखणियपक्खे कहमेयं तं ति पच्चभिण्णायं ? अह जुटुं तो सव्वं साणुभवं भणह जं किंचि' । इच्चेवमाइ गुरुणा पण्णविओ वि जाहे न पडिवज्जइ ताहे निण्हवो त्ति नाऊण संघबाहिरो कओ । सामिमुत्तिसमयाओ य तया वीसुवराणि दो वाससयाणि त्ति ।
आसमित्तो वि सव्वं वत्थु 'खणे खणे विणस्सइ'त्ति देसणाए सव्वं लोगं वुग्गाहिंतो रायगिहं गओ। तत्थ खंडरक्खिया नाम समणोवासया । ते य सुंकपाला । तेहिं ते निण्हवा जाणिया तओ मारिउमारद्धा। ताहे वि भीया भणंति – 'अम्हेहिं सुयं जहा तुम्हे सड्ढा । तहा वि एत्तिए संजए मारेह ?' । ते भणंति - 'जे समणा सावया य होता ते वोच्छिण्णा, संपयमण्णे के वि तुब्भे अण्णे य अम्हे । तहा सयमेव विणस्सिहह, को तुब्भे विणासेइ ? तुब्भं चेव सिद्धंतो । जइ परं सामिस्स सिद्धतेण ते चेव तुब्भे तेहिं चेव अम्हेहि विणासिज्जह [जओ तं चेव वत्थु कालादिसामग्गि पप्प पढमसमयकत्तेण वोच्छिज्जइ दुसमयकत्तेण उप्पज्जति एवमादि]' । एत्थ ते संबुद्धा भणंति - 'इच्छामो अज्जो ! सम्मं परिचोयणा, एवमेयं न अन्नहा' । तओ तेहिं खामिऊण सपरिवारो मुक्को आसमित्तो त्ति ॥छ। आसमित्तो त्ति गयं ॥छ।
[आसमित्त]विरोहिय(हओ) नवमवरिसे संजाओ निण्हवो गंगदेवो त्ति ॥छ।।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |